La creación d'empreses xube un 30,4% en xineru n'Asturies

   UVIÉU, 11 Mar. (EUROPA PRESS) -

   La creación de nueves empreses n'Asturies xubió un 30,4% en xineru en tasa interañal con un total 180 sociedaes mercantiles constituyíes, nun mes nel que les empreses disueltes fueron 89, un 15,6% más, según los datos espublizaos esti martes pol Institutu Nacional d'Estadística (INE).

   Col ascensu de xineru, la creación d'empreses n'Asturies encadena dos meses consecutivos de crecedera interañal, según los datos mentaos.

   Pa la constitución de les 180 empreses creaes el pasáu mes de xineru suscribiéronse daqué más de 12,69 millones d'euros, lo que supón un 144,76% más que nel mesmu mes de va un añu (12,69 millones de capital desembolsau).

   De les 89 empreses qu'echaron el zarru'l pasáu mes de xineru n'Asturies, 76 ficiéronlo voluntariamente; 7 por fusión con otres sociedaes y les otres 6 restantes por otres causes.

   La Rioxa (48,39%) Murcia (46,32%) y Baleares (40,45%) fueron les que rexistraron crecederes más grandes na creación d'empreses, ente que nel llau contrariu asitiáronse Cantabria, Aragón y Canaries con retrocesos d'un 25,24%, 19,22% y un 18,01%, respectivamente.

   Tocantes a la disolución d'empreses, La Rioxa (120%), Castiella - La Mancha (28,81%) y Asturies (15,58%) fueron les comunidaes que más empreses destruyeron en tasa interañal, ente que Navarra, Murcia y Estremadura les que menos, con retrocesos d'un 90,91%, 41,82% y un 26,67%, respectivamente.

   Pela so parte, el númberu de sociedaes mercantiles qu'ampliaron capital baxó un 34,9% n'Asturies en xineru, hasta les 41 empreses. El capital suscritu en diches ampliaciones algamó los 15,55 millones d'euros, cifra un 37% inferior a la de xineru del añu anterior