Cuatro feches ganen reconocencia institucional en memoria del Estatutu, el covid, el municipalismu y la bandera

   UVIÉU, 23 Jun. (EUROPA PRESS) -

   El Boletín Oficial del Principáu d'Asturies (BOPA) publicó esti llunes l'alcuerdu del Conseyu de Gobiernu asturianu pol que se declaren cuatro feches institucionales nel Principáu d'Asturies. Trátase de cuatro feches coles que l'Executivu autonómicu quier da-y la "máxima considerancia" a "les instituciones de gobiernu y alministración de la Comunidá Autónoma y la reconocencia de la so relevancia histórica, política y social".

   El resolvimientu, recoyiu per Europa Press, recueye que d'equí p'arriba, el 31 de xineru va ser el 'Día de les Instituciones Asturianes', en conmemoración de la entrada a valir del Estatutu d'Autonomía en 1982, que consolidó a Asturies como comunidá autónoma uniprovincial y sentó les bases de la so actual arquitectura institucional. Nesta xornada, les instituciones van celebrar xornaes de puertes abiertes p'averase a la ciudadanía.

   El 11 de marzu va dedicase a la memoria de les víctimes del Covid-19, recordando'l fallecimientu del primer asturianu por causa de la pandemia en 2020. El Principáu recuerda que la pandemia causó 5.325 muertes na rexón. "Nun puen quedar nel olvidu: van ser recordaos polos sos seres queríos y pola comunidá de la que formaben parte", reflexa'l resolvimientu.

   L'actu central, que yá vieno celebrándose estos años, va cuntar con una ufrienda floral nel texu de la memoria, xuntu al Hospital Universitariu Central d'Asturies (HUCA), presidida pol Presidente del Principáu.

   Per otru llau, el 3 d'abril institúyese como 'Día del Municipalismu Asturianu', n'alcordanza de les primeres elecciones locales democrátiques de 1979, que marcaron l'entamu de la democracia nos conceyos asturianos y el protagonismu de los conceyos na xestión local.

   "Casi mediu sieglu dempués de les elecciones locales de 1979, ye importante recordar esta fecha, na que los asturianos y les asturianes recuperaron la so participación na xestión de los asuntos más próximos", reflexa'l BOPA. Esti día van celebrase actos institucionales tendentes a reconocer y destacar la importancia de les corporaciones locales.

   A lo último, el 25 de mayu va ser el 'Día de la Bandera', como "símbolu d'unión y fortaleza de la ciudadanía asturiana", n'homenaxe al alzamientu de la Xunta Xeneral contra la invasión francesa de 1808.