UVIÉU, 26 May. (EUROPA PRESS) -
La Conseyería de Cultura, Política Llingüística y Turismu principió los trámites pa la llicitación de les obres de restauración y caltenimientu de la fonte prerrománica de Foncalada, n'Uviéu.
El proyectu va suponer la llimpieza, afitamientu y selláu d'estructures, hidrofuxación y la renovación de la señalética nel monumentu. El plazu d'execución de los trabayos va ser de trés meses y la inversión prevista xube a 40.000 euros, según indiquen dende l'Executivu autonómicu.
El plan contempla que pa la llimpieza de les plantes y pátines bioxéniques s'empleen métodos mecánicos y químicos con tratamientos biocides y funxicies. Tamién se van retirar los morteros de reposición empleaos n'époques anteriores a base de cementu portland, que van sustituyise por morteros asemeyaos y compatibles col orixinal, compuestos a base de cal hidráulicu natural, ente otros elementos.
Los trabayos van incluyir la sustitución de los cantos rodaos qu'existen na canal formada poles planches de formigón que componen la plaza y les estructures orixinales, y que se van reemplazar por grava de menor tamañu.
Coles mesmes, contémplase'l saneamientu de los zócalos modernos del perímetru de la plaza. La hidrofuxación va consistir na aplicación d'un productu químicu que nun alterie'l color de los materiales, y col que se van facer delles pruebes, anque yá s'ensayó con anterioridá.
