Asturies va participar na Feria d'Arte de Shanghái y va asumir la representación autonómica del programa 'Europa Creativa'
Cultura va recuperar la Filmoteca d'Asturies y prepara la candidatura de La Llaboral a Patrimoniu de la Humanidá
UVIÉU, 26 Mar. (EUROPA PRESS) -
La conseyera de Cultura, Política Llingüística y Deporte, Vanessa Gutiérrez, indicó que dende'l Principáu van trabayar a lo llargo d'esta llexislatura en delles estratexes p'ameyorar les condiciones llaborales de los profesionales del sector, "que ye tanto como dicir que queremos ameyorar les condiciones de vida de los asturianos y les asturianes".
Asina lo indicó nuna comparecencia na Xunta Xeneral pa informar del so programa de gobiernu. Nesi sentíu, afirmó que'l mesmu va buscar promocionar la cultura asturiana como factor d'identidá y mediu de cohesión social, amás de garantizar los derechos culturales de los ciudadanos o la defensa y promoción del asturianu y del gallego-asturianu como patrimoniu rexonal.
Otru de los exes va ser la profesionalización del sector y el desarrollu de les industries creatives, amás de la so reconocencia nacional y internacional. Too eso, recordó, va facese al traviés del diálogu colos colectivos implicaos al traviés de foros d'alcuentru.
Gutiérrez recordó los datos d'un estudiu de la cultura n'Asturies qu'indicaba qu'en 2019 esta industria facturó 230 millones y xeneró empléu pa 5.700 persones, pero en 2020, pola pandemia, la facturación baxó a 176,5 millones y la ocupación a 4.814 persones, un 17% menos que l'añu anterior.
Unos datos que según la conseyera muestren "la importancia del sector y la prioridá d'apoyalo". Una de les primeres midíes va ser adaptar les convocatories de subvenciones a la demanda de la industria con pagos anticipaos o convocatories tresanuales.
Per otru llau, destacó que tamién se va trabayar na so proyección esterior. Nesi sentíu, anunció qu'Asturies va asistir en 2024 pela primer vez a la Feria d'Arte de Shangái de la mano del Institutu Cervantes. Per otru llau, el Principáu tamién va collaborar col Festival Bime, el Festival Intercélticu de Lorient o la Feria del Llibru de Guadalaxara.
Gutiérrez tamién indicó qu'Asturies va ser la comunidá autónoma que va asumir la representación autonómica pal bieniu 2024-2025 nel comité de xestión intergubernamental del programa 'Europa Creativa', de la Comisión Europea.
Sobre'l desarrollu normativu, la conseyera indicó que nun periodu curtiu esperen llevar a la Xunta Xeneral lleis como la de Biblioteques, de Museos, d'Archivos, del Belles Artes o'l cambiu de la Llei d'Usu del Asturianu, amás d'un Plan de Normalización Llingüística. Amás, ta llexislatura va poner en marcha l'Axencia Asturiana de Industries Culturales y va recuperase la Filmoteca d'Asturies.
P'acabar, el Principáu espera que la cultura sidrera sía reconocida como patrimoniu mundial y principiar los trámites pa llanzar la candidatura de La Llaboral. Amás, Cultura va declarar como BIC la cultura minera, la danza asturiana o les mazcaraes d'iviernu.
LLINGUA
Sobre la llingua asturiana y el gallego-asturianu, Vanessa Gutiérrez esplicó que la oficialidá ye "un oxetivu irrenunciable pa esti Gobiernu y mentes que nun s'algame vamos siguir trabayando pa garantizar los derechos llingüísticos de los asturianos".
Nesi sentíu, la conseyera indicó que van siguir reclamando al Estáu que reconoza la especialidá docente pal profesoráu de 'Llingua y Lliteratura Asturiana', amás de la igualdá de tratu con otres llingües oficiales.
Un pidimientu que según Gutiérrez el Ministeriu yá "atendio en parte", al permitir la llingua asturiana en dos llinies d'ayudes pa la industria editorial. Per otru llau, bien ceo va tar disponible la versión nueva del traductor online 'Eslema' y l'Executivu va siguir fomentando la enseñanza p'adultos en collaboración colos Conceyos.
