Deteníu'l líder del grupu neonazi 'White Boys Madrid' por agredir a universitarios en Madrid

UVIÉU, 17 d'Avientu (EUROPA PRESS)

Axentes de la Policía Nacional detuvieron a Sergio R.M. de 35 años, máximu responsable d'un grupu skinhead d'ideoloxía neonazi en Madrid, como'l presuntu responsable d'un delitu d'asociación ilícita y contra los derechos fundamentales, por agredir en marzu a un grupu d'universitarios na Complutense, informó la Xefatura Superior de la Policía de Madrid nun comunicáu.

Concretamente, el grupu d'estrema derecha llámase 'White Boys Madrid', según indicó na so cuenta de Twitter la delegada del Gobiernu en Madrid, Cristina Cifuentes, que felicitó a la Policía por esta detención.

L'arrestáu colgaba na rede videos de los actos vandálicos que cometía col so grupu, onde podía vese ente otres coses, pintaes con conseñes racistes, antisemites y contra la ideoloxía d'izquierdes.

Como resultáu del rexistru na so casa garróse-y numberosu material subversivu, consistente en pancartes y pegatines con lleendes d'altu conteníu racista, como 'Europa pa los europeos', 'Guerra Madrid, la llucha va empezar', cruces céltiques, un símbolu iconográficu de la ideoloxía nazi, asina como bengales y cuchiellos.

Les investigaciones entamaron cuando los axentes tuvieron conocencia de la publicación y espardimientu al traviés d'un portal d'Internet de dellos vídeos grabaos con cámara doméstica, nos que se recoyíen actos realizaos por un grupu de mozos de marcada ideoloxía neonazi. Nellos, los protagonistes mientres cubríen les sos cares, manifestaben idees racistes y provocaben al odiu y a la violencia contra grupos minoritarios.

CARTELOS CON LLEENDES INSULTANTES

A partir d'ehí, los axentes entamaron les pesquises que revelaron que dichos vídeos soversivos subiéralos a la rede'l deteníu, que facía llamase "MadridAntiAntifa". En dichos vídeos, amás, víase cómo los integrantes del grupu skinhead y l'arrestáu poníen cartelos y pegatines sobre inmuebles urbanos a manera de 'graffiti' con lleendes insultantes.

Amás los policíes pudieron constatar que dicha banda foi la responsable de les agresiones asocedíes el pasáu día 9 de marzu na Facultá de Ciencies de la Información de la Universidá Complutense de Madrid, cuando polo menos 20 individuos d'estética skinhead neonazi, vistíos toos ellos con ropa escuro y tapeciendo les sos cares con mázcares, empezaron a golpiar a los mozos ellí presentes, resultando deteníes por estos fechos siete persones por un delitu de lesiones.

La operación realizóla'l Grupu XXX de la Brigada Provincial d'Información, perteneciente a la Xefatura Superior de Policía de Madrid.