Dimite Jesús Montes Estrada, 'Churruca', como coordinador d'IU de Xixón

XIXÓN/UVIÉU, 2 de Febreru (EUROPA PRESS)

El coordinador d'Izquierda Unida de Xixón, Jesús Montes Estrada, conocíu históricamente nel ámbitu políticu como 'Churruca', presentó la so dimisión del cargu, xunto col secretariu d'organización, Guillermo Miranda, y l'adxuntu a la Secretaría d'Organización, Xabel Llano, nel Conseyu Políticu celebráu esti miércoles.

El motivu foi, per un llau, el pidimientu d'una convocatoria específica d'un conseyu políticu monográficu pa tratar "la tensión existente ente la dirección del partíu y el so grupu municipal", que demandaron formalmente 30 de los 43 miembros presentes nel citáu Conseyu. Una solicitú que ficieren en repitíes ocasiones de forma verbal pero que nun llograra respuesta per parte de la Dirección d'IX-Xixón, según el voceru del Conseyu Políticu, Toni Hevia, en rueda prensa na sede llocal del partíu.

Otru puntu de discordia foi'l refugu del 'Informe d'Organización y Presupuestos' que presentaron, al votar en contra 28 de los 43 miembros presentes nel Conseyu y seis a favor, mientres qu'hubo nueve astenciones. El refugu prodúxose polo "incompleto" del informe presentáu y los datos económicos "sesgaos" qu'ofrecía, que pese a que podíen ser ciertos, nun taben contestualizaos.

La reducción de representatividá municipal tres les elecciones llocales -al quedar con namás un conceyal lliberáu y dos alministrativos a xornada parcial-- dexóse notar nos ingresos del partíu y el control sobre estos recursos foi ún de los puntos de rocea.

Hevia, que quiso aprovechar pa homenaxar la "exemplarísima" trayectoria del históricu militante Manuel García González 'Otones', fináu esti miércoles, esplicó que l'informe nun respondía al problema de fondu existente d'organización, finances y comunicación ente'l Grupu Municipal y l'Executiva del partíu. Sobre esti últimu, señaló que la tensión ente ambos dexóse notar nel branu pasáu.

Tamién dexó claro que "en nengún momentu naide manifestó acabamientu o falta de reconocencia" a la Dirección del partíu y calcó en que nun hubo percepción de qu'esta tuviera "frenando" l'acción política del grupu municipal. Sí hubo tensión, reflexada, al so xuiciu, en delles ausencies o un menor apoyu. D'ehí que se pidiera dende va meses un debate nel que tratar un problema que nun beneficiaba en nada, anque nunca se pidió la dimisión.

Hevia, amás, destacó la llucha "ininterrumpida" de Churruca mientres décades, anque, sicasí, indicó qu'esi episodiu va ayudar a rematar el procesu de renovación interna de cares nueves entamáu nes últimes elecciones llocales, cuando Jorge Espina sustituyó a 'Churruca' como cabeza de llista. Pa él, nun ha ser una confrontación de la mocedá del partíu cola vieya guardia. "Nun ye la salida que debiera dase", señaló sobre la dimisión

VIEYA GUARDIA Y MOZOS CACHORROS

Xunto con Hevia, tuvieron na rueda de prensa'l mesmu Espina, la conceyala Libertad González y la responsable del área de la Muyer d'IX-Xixón, Adriana Ballesteros. Espina constató que "nunca" se explicitaron diferencies per parte de la Dirección col grupu municipal si ye que les había, pero sí una falta de comunicación, de la que dixo desconocer les razones. Matizó, eso sí, que "nun hai enfrentamientos ente nenguna vieya guardia y los mozos cachorros".

Ye más, remarcó que les últimes actuaciones del grupu municipal, como la postura ante'l proyectu de Presupuestos municipales o'l debate d'investidura, aprobáronse por unanimidá nel Conseyu Políticu, incluyíu 'Churruca'. Al so xuiciu, la dimisión trátase d'una decisión personal y nun respuende a diferencies polítiques, anque apuntó a la posibilidá de qu'al refugase de manera tan clara'l so informe entendieren que nun contaben col apoyu d'IU-Xixón.

Espina resaltó que los trés ediles -Francisco Santianes nun acudió al tar fuera de la rexón-- llamenten "fondamente nel planu políticu y personal" la dimisión de 'Churruca', dao que fueron munchos los años y batalles pa meyorar les condiciones de los trabayadores. "Nun ye agradable pa naide", repostió.

Per otru llau, a resultes de la dimisión de 'Churruca', acordóse qu'esti vienres va celebrase un nuevu Conseyu Políticu, a les 19.00 hores, pa escoyer una Dirección colexada, que faiga frente a la situación y a les elecciones autonómiques del próximu 25 de marzu, amás de que convoquen una asamblea d'IU n'abril p'aprobar un nuevu programa políticu por cuatro años y escoyer un nuevu coordinador llocal.

Preguntáu Espina sobre si va presentase como coordinador llocal, calcó en que'l so planteamientu no político ye que nun ye buena l'acumulación de cargos, pa de siguío puntualizar que tampoco ye buento antemanase a los fechos. Nesti sen, indicó que nun tien tovía una decisión tomada al respecto.

REACCIÓN D'IU ASTURIES

Pela so parte, el coordinador d'IU Asturies, Jesús Iglesias, llamentó la decisión de Churruca, col que, según recordó, coincidió en gran parte de les sos responsabilidaes polítiques. El tamién voceru de la coalición na Xunta Xeneral aseguró na mañana d'esti xueves que tovía nun conocía les razones de la dimisión, puesto que taba pendiente de falar con él.