UVIÉU, 4 de Mayu (EUROPA PRESS)
Diputaos, cargos autonómicos y alumnos de los colexos públicos Fozaneldi (Uviéu) y La Puela Ayande compartieron esti miércoles el salón de plenos de la Xunta Xeneral pa tomar parte na llectura de testos en 'llingua' asturiana, nel actu institucional de la Selmana de Les Lletres Asturianes.
L'actu abriólu y conúxolu'l presidente de la Xunta Xeneral, Pedro Sanjurjo, que se dirixó a los presentes en 'fala' occidental y que lleyó'l testu 'O eco do rego da pena', d'Aurora García Rivas. Tanto él como'l conseyeru de Cultura, Genaro Alonso, aprovecharon les sos intervenciones pa destacar la importancia del caltenimientu de la llingua como patrimoniu de tolos asturianos.
El responsable de Cultura lleyó'l testu 'Heredera', de Lourdes Álvarez. Del Conseyu de Gobiernu tamién tomó parte la conseyera de Desarrollu Rural, María Jesús Álvarez, que lleyó 'Los últimos pasinos', de Carmen Gómez Güeya.
Tolos grupos políticos del parlamentu tuvieron representaos nel actu. Del Grupu Socialista lleyeron, ente otros, Nuria Devesa ('Carbonera', de Mánfer de la Llera) y Carmen Eva Pérez Ordieres ('Lección de Gramática', de Berta Piñán). Del PP, Pedro de Rueda lleyó 'Trespasu', de Xuan Santori, y Carlos Suárez optó por 'Indigu', de Humberto Gonzali.
De Podemos, el voceru parlamentariu, Emilio León, ente otros diputaos, apostó por 'Hai que siguir', d'Andrés Solar, y d'Izquierda Unida, Concha Masa llevó un testu de Luz Pontón Álvarez ('L'aire sur'). La presidenta de Foru Asturies, Cristina Coto, dio llectura de 'Pra vivir', de María José Fraga, y el voceru parlamentariu de Ciudadanos, Nicanor García, escoyó 'Nesi trance', de Xulio Arbesú.
En representación de los dos centros educativos, Andrea García López (CP Fozaneldi), escoyó un fragmentu de 'El Principín', tornáu por Xosé Lluis García Arias cola collaboración de Marta Suárez. Pela so parte, Pablo Barredo Egido, del Centru Públicu d'Educación Básica de La Puela Ayande, optó por 'Les gaviotes', d'Urbano Rodríguez.
