Un discu conmemorativu recueye ventitrés versiones de cantares de Xentiquina de diferentes grupos asturianos

UVIÉU, 30 de Xunu (EUROPA PRESS)

Un discu conmemorativU, publicáu pola discográfica y productora Algamar, recueye les versiones que 23 grupos de música asturianos de dellos estilos ficieron de los cantares del coru escolar Xentiquina. El trabayu inclúi tamién un documental que repasa los 25 años d'historia d'esti proyectu pedagóxicu dirixíu pol maestru y músicu Nachu Fonseca.

El responsable d'Algamar y realizador Cinematográficu, Pablo Quiroga, presentó güei esti doble discu y DVD en rueda prensa, acompañáu por Manu Fonseca, fíu de Nachu Fonseca, y pol cantautor Alfredo González, ambos participantes na grabación. La presentación del álbum coincide col homenaxe qu'esti xueves va recibir el mesmu Fonseca nel Auditoriu d'Uviéu, nun conciertu nel que, amás del propiu coru infantil, van actuar dellos de los grupos incluyíos nel recopilatoriu. Va ser la despidida al llabor de Fonseca, que tres 25 años al mandu de los coros Xentiquina y Seliquín, xubílase.

La grabación inclúi versiones de conxuntos folk como les de Llangres ('La primavera'), Tuenda ('Andolina') o La Col.la Pronpinde ('Los Gochinos'), rock, como Los Berrones ('La moto Pachín') o ska, como Skama la Rede ('El coche'l maestru'). Tamién inclúi alguna sorpresa, como la del grupu candasín Güerku, disueltu yá hai años y que volvió axuntase pa realizar la grabación de 'Una de mieu'.

Animáronse tamién a participar grupos que nun suelen utilizar la 'llingua' asturiana nos sos cantares, tales como Losone ('Duermi'), Bueno ('El canciu les mentires'), Pauline en la Playa ('La Serena'), Art Decó ('El farol'), Pequeño Club Imposible ('Marchóme la gata') o Supereula ('El blues de les gafes'). Trátase d'un detalle que resaltó'l mesmu Quiroga, como muestra del carácter normalizador d'esti CD, puesto que conxuntos que nun usen l'asturianu avérense a esta 'llingua'.

El CD inclúi tamién un tema de la cantante Esther Fonseca ('L'iviernu'), fía de Nacho Fonseca, y que contó cola collaboración del so propiu hermanu a la flauta. Esti últimu destacó que'l so padre "ta nuna nube" cola edición d'esti trabayu colectivu que, na so opinión, tuvo un resultáu "alucinante".

Pablo Quiroga xustificó esti CD, pol so calter pedagóxicu en favor de la 'llingua' asturiana. Pela so parte, Alfredo González, que canta 'Llueve' acompañáu pola gaita de José Ángel Hevia, señaló que la música de 'Xentiquina' ye "parte" de la so vida, y mostróse arguyosu de collaborar con un proyectu que va valir de referente "mientres munchos años".

DOCUMENTAL

El CD inclúi un DVD que, baxo'l títulu 'Seliquín-Xentiquina. Una ferramienta pedagóxica al serviciu de la escuela n'Asturies', repasa los 25 años del coru infantil. Inclúi los testimonios, ente otros, del delegáu de Gobiernu, Antonio Trevín, del vocalista de Dixebra, Xune Elipe, del director del Festival Intercélticu de Lorient, Lisardo Lombardía, y de Xosé Antón González Riañu, miembru de l'Academia de la Llingua Asturiana.

El trabayu, d'una hora y 17 minutos de duración, va presentase llueu nun actu públicu en La Pola Siero.