UVIÉU, 05 de Mayu (EUROPA PRESS)
La obra lliteraria y la vida de compromisu social y políticu del escritor Manuel d'Andrés Fernández, conocíu como Mánfer de la Llera, amás del contestu históricu nel que les desarrolló son temes d'análisis en dos nuevos volumes publicaos pola Conseyería de Cultura del Gobiernu asturianu, y presentaos esti xueves oficialmente en Llangréu.
Esti conceyu mineru, d'onde yera natural Mánfer de la Llera, acoyó esti añu los actos de la Selmana de les Lletres, dedicada al poeta y narrador mineru. L'actu tuvo llugar en Llangréu, y contó cola presencia, ente otres persones, de los coordinadores de los volumes editaos, los investigadores y espertos lliterarios Luis Casteleiro y Severino Antuña, amás de la directora xeneral de Política Llingüística, Consuelo Vega, la teniente d'alcalde del Conceyu, María Fernández, y el responsable d'Ámbitu, entidá propietaria de la editorial Trabe, Inaciu Iglesias.
'De la rampla a la pluma' ye un volume "divulgativu" que recueye artículos sobre la biografía de Mánfer de la Llera, del contestu históricu llangreanu, de la so vida como militante nos barrios de Xixón y d'otres curiosidaes del artista. El so títulu fai un guiñu a 'Del aráu a la pluma', antoloxía lliteraria asturiana editada na época del primer surdimientu, sostituyendo la rampla minera, pol aráu agrícola.
Collaboren nesta obra, ente otros, Armando Magadán, encargáu de la biografía, Aladino Fernández (el Llangréu de la época), el periodista Paco Álvarez (que recuerda a Mánfer como militante de barriu de Xixón) o Inaciu Llope, que fai un análisis sobre la doble transición.
Ún de los apartaos más emblemáticos ye'l d'Irene Díaz, que fala del movimientu pensionista, nel que Mánfer de la Llera tomó parte mui activa. Asina, inclúise un artículu de Jesús Menéndez Peláez, profesor y antiguu cura. En 1971 taba temporalmente destináu na ilesia de San José (Xixón), na que Mánfer y otros 80 pensionistes de la Comisión Provincial de Pensionistes d'Asturies ficieron un enzarru reivindicativu.
La Policía franquista reprimió duramente a los enzarraos, y munchos d'ellos fueron a xuiciu. Nel procesu, el párrocu Peláez declaró como testigu en favor de los acusaos, pese a lo que nun pudo evitar algunes condenes. Sicasí, el so xestu valió-y l'agradecimientu del escritor asturianu.
El segundu volume, 'En cata de la mio lluna', tituláu como un versu del autor, ye una antoloxía lliteraria, seleccionada por Severino Antuña, que s'emocionó pol fechu de que les instituciones dieren la cara por un escritor autodidacta y fíu de la minería.
El llibru recueye poesía y prosa de Mánfer. Apaecen poemes como 'Xubiláu', 'Mira a ver tu, poeta', 'El bable', 'Asturies eterna', 'Acabación' o 'Soledá'. Tamién s'incluyen cuentos como 'Nueche avegosa', o cróniques como 'El día qu'estalló la revolución', amás de los llamaos testos paralelos, que Mánfer componía como poemes y dempués tornaba en narraciones prosaiques.
Nel actu tuvieron tamién varios de los autores del primeru d'estos volumes, amás de los fíos del autor, Vital, Efrén y Ramón d'Andrés. María Fernández agradeció la elección de Llangréu como sede de la Selmana de Les Lletres, mientres que Consuelo Vega destacó'l papel activista, políticu, social y asociativu de la vida y otra de Mánfer.
