Eduardo Galeano, l'escritor que retrató la desigualdá n'América Llatina

GETTY

MONTEVIDÉU, 14 d'Abril (Reuters/EP)

El reconocíu autor uruguayu Eduardo Galeano, que supo reflexar nel so llibru 'Las venas abiertes de América Latina' les tensiones ente los países desarrollaos y la cuna de los sos recursos naturales, morrió esti llunes en Montevidéu a los 74 años.

Tayante nes sos opiniones, radical nos sos conceptos, sin pelos na llingua pa redactar, l'escritor, periodista y editor buscó espaciu pa la voz de los más desfavorecíos, les víctimes polítiques de los gobiernos militares, y hasta de la naturaleza. Les palabres cencielles, y un pocu d'ironía, yeren el so secretu.

"Busco un llinguaxe non solemne que permita pensar, sentir y prestase, non avezáu nos discursos d'izquierda", dixo en mayu del 2012 al diariu español 'El País' antes de presentar el so llibru 'Los hijos de los días', qu'axunta 366 hestories de persones anónimes y conocíes, una pa cada día del añu.

Galeano, que vivió hasta la so muerte na capital, Montevidéu, finó tres dellos años de lluchar contra un cáncer de pulmón que deterioró la so salú. "Somos un instantito solo en la memoria del tiempo", dixo a 'El País' de Madrid en mayu del 2004.

Na so mocedá, antes d'escribir la so primer crítica de cine, tuvo dellos oficios: "quise ser xugador de fútbol, como tolos uruguayos, pero yera una pata de palu horrible. Quixe ser pintor, dibuxante, biende coses y trabayé en munches. Fui obreru nuna fábrica, cobrador, dibuxante de lletres, etcétera".

Cuando probó como caricaturista, plantáse frente a una fueya en blancu yera motivu de tensión, más que nada porque sentía un abismu ente lo que pensaba y aquello qu'a lo último dibuxaba. "La llerza a aquella fueya en blancu tovía ye güei la mesma", confesó tiempu atrás.

"SOI UN CAZADOR D'HISTORIES"

Pero descubrió na escritura la so vocación. "Too ta ehí. Salgo a la cai cada día colos mios oyíos y güeyos bien llimpios pa sentir les voces secretes y descubrir los colores escondíos. Soi un cazador d'histories, un escuchador de voces", dixo nel 2004.

Una pequeña llibreta y un bolígrafu nel so bolsu fueron a diario cómplices de les sos idees, vivencies y camientos, que diba rexistrando pa nutrir dempués les sos obres.

Magar reconocer la so afinidá cola ideoloxía d'izquierda, refalgaba la etiqueta d'escritor políticu: "Ye daqué que refugo, porque me llenda y amenaza con torname nun autor panfletariu, a les ordes de dalgún partíu o dalguna relixón, y eso nun tien nada que ver conmigo".

Sicasí, foi-y difícil evitalu tres la publicación en 1971 del so llibru 'Las venas abiertas de América Latina', el mesmu que'l daquella presidente de Venezuela Hugo Chávez regaló nel 2009 al so homólogu estaounidense Barack Obama.

Y el mesmu qu'impulsó a Galeano al exiliu cuando en 1973 los militares dieron un golpe d'Estáu n'Uruguai ya instalaron un Gobiernu de facto hasta 1985.

"'Las Venas...' foi un puntu de partida, non de llegada. A partir d'ehí fui desarrollando un llinguaxe propiu. Tomé otros estaos, otros perfiles, otros temes de la realidá", comentó en febreru del 2013 nuna entrevista col Colectivu d'Escritores Aristóteles d'España.

Les sos obres permanecen vixentes años dempués d'escribise. Asina, temes polémicos o cotidianos sobre la condición humana y cómo se vinculen les persones, los países y los continentes van siguir llatentes magar que la pluma de Galeano cesara.