Educación principia una campaña pa incentivar la matriculación del alumnáu en llingua asturiana y gallego-asturianu

EDUCACIÓN

UVIÉU 10 Abr. (EUROPA PRESS) -

La Conseyería d'Educación principió güei una campaña p'afalar la matriculación del alumnáu de Primaria, Secundaria y Bachilleratu en llingua asturiana y en gallego-asturianu en centros sosteníos con fondos públicos pal cursu viniente. La principal novedá ye qu'esta iniciativa va desenvolvese en dos temporaes coincidiendo colos periodos de solicitú de places y d'inscripción.

La campaña publicitaria, que lleva por lema 'Apúntome, apuntámoslos', va tar presente en medios impresos, dixitales y nes redes sociales Facebook y Instagram. D'esta manera, compaxínense los formatos tradicionales coles canales nueves de comunicación utilizaes pola mocedá.

La primer temporada empieza esti miércoles y va allargase hasta'l 21 d'abril, un día enantes del empiezu de la fase d'almisión, que va permanecer abierta hasta'l 7 de mayu. La segunda va ser del 13 al 23 de xunu. Per otru llau, el periodu de matriculación va desenvolvese del 19 al 26 de xunu pal alumnáu d'Infantil y Primaria, y del 1 al 12 de xunetu pal de Secundaria y Bachilleratu.

La iniciativa destaca'l valir de la diversidá llingüística y cultural, amás de los beneficios que supón estudiar les distintes llingües d'Asturies nes distintes etapes educatives y na so rellación coles señes d'identidá autóctones. Tamién inclúi un lema adaptáu al públicu oxetivu, que destaca la ufierta nes enseñances obligatories y el Bachilleratu.

La campaña diríxese espresamente a la comunidá educativa y tamién a tola ciudadanía, con un diseñu visual pa la población más mozo y nun llinguaxe cenciellu, adaptáu pa tolos públicos y non sexista. Ye moderna, dinámica y acorde con una sociedá que favorez la convivencia, la integración y les tradiciones. Cada acción utiliza la etiqueta #educallingua.

Amás, esta iniciativa promocional dexa claro que la llingua asturiana ye d'ufierta obligatoria nes etapes educatives de Primaria, ESO y Bachilleratu y que ta abierta a cualquier estudiante interesao en cursala. Tamién tien presente la igualdá, la diversidá, la equidá y la calidá educativa.

Los conteníos de la campaña tán disponibles nel portal Educastur (www.educastur.es/asturianu/centros), onde hai tamién información básica sobre estes enseñances y les feches de matriculación.

MATERIALES DE REFUERCIU

Per otru llau, la conseyería va repartir nos díes vinientes nos centros educativos una serie de materiales que tamién tienen como oxetivu incentivar la matriculación. La entrega va realizase en dos fases. Primero, van distribuyise folletos informativos desplegables y cartelos divulgativos. Más tarde, de cara al periodu de matriculación, van ufiertase marcapáxines col calendariu escolar del cursu viniente.

"Esta campaña respuende al compromisu de la Conseyería d'Educación de promover l'usu, la promoción y l'enseñanza del asturianu y el eonaviegu, en cumplimientu de la Llei 1/1998, de 23 de marzu, al empar que de potenciar la pluralidá llingüística y cultural del Principáu", indicaron desde l'Executivu al traviés de nota de prensa.

La iniciativa coincide, amás, con un cursu escolar nel que la materia de Llingua Asturiana y Lliteratura esperimentó una medría de 822 matriculaos. De los 19.202 estudiantes d'asturianu y gallego-asturianu en Primaria, ESO y Bachilleratu del cursu 2022-2023 pasóse anguaño a 20.024.