Esti llunes arranca'l Veranu Lliterariu de Corvera con cuentos, reines y unicornios pa los más neños

   UVIÉU, 28 Jul. (EUROPA PRESS) -

   El escritor Pablo Fraile Dorado va dar comienzu esti llunes al Veranu Lliterariu en Corvera, una actividá de promoción y animación a la llectura de lliteratura infantil n'asturianu que va celebrase nel Salón d'Actos del Centru Sociocultural de Les Vegues de 11.30 a 12.30 hores.

   El Veranu Lliterariu, qu'algama yá les trece ediciones, ye una actividá organizada pola Casa de la Llingua-Serviciu de Normalización Llingüística de Corvera. Va siguir desarrollándose a lo llargo d'agostu nel Salón d'Actos del Centru Sociocultural de Les Vegues.

    Nesta ocasión Fraile va participar nel Veranu Lliterariu col llibru El cantar de la reina unicorniu, una fantasía épica cola que l'autor, usando les estructures de los cuentos de tradición oral pero actualizándoles dende una perspectiva contemporánea, lleva a los llectores a conocer a Zonraconebü, reina que quier evitar que la guerra estroze al so pueblu y que pa facelo va tener que necesitar l'ayuda d'una pequeña heroína y d'un unicorniu azul.

   Pablo Fraile Dorado (Xixón, 1985) ye escritor y periodista y tamién una de les nueves voces de la lliteratura infantil (bien n'asturianu, bien en castellanu). Autor de títulos como Tigre va de gala, Arón el gaturratón, Nueve cuentos azules, La llingua de les xanes o Bruxa.