La FACC presenta 'Falamos 2024' poniendo clases d'asturianu y gallego-asturianu na Plaza La Escandalera

UVIÉU 3 Sep. (EUROPA PRESS) -

La Federación Asturiana de Conceyos (FACC) va presentar esti martes, 3 de setiembre, a les 17.30 hores, na Plaza La Escandalera, n'Uviéu, el Programa 'Falamos 2024' d'enseñanza d'asturianu y gallego-asturianu.

Nel actu van ponese dos clases de dambes llingües como exemplos de la metodoloxía llectiva d'esta formación gratuita pa persones adultes. La so finalidá ye que l'alumnáu pueda desendolcase, mesmo de forma oral qu'escrita, en situaciones cotidianes.

La presentación de Falamos 2024 va cuntar cola participación de la Presidenta de la FACC, Cecilia Pérez Sánchez, y del director xeneral d'Acción Cultural y Normalización Llingüística, Antón García Fernández, acompañaos por una representación municipal de los conceyos onde se van impartir los cursos presenciales programaos.

Xunto colos niveles básicos d'asturianu y gallego-asturianu colos que Falamos entamó la so actividá en 2022 y de les sos modalidaes online puestes en marcha en 2023, nesta edición 2024 va presentase como novedá la incorporación del nivel mediu d'asturianu.

Falamos ye un programa sovencionáu pola Conseyería de Cultura, Política Llingüística y Deporte y xestionáu pola FACC. Les inscripciones nestos cursos pueden facese al traviés de la web Falamos.info.