El fiscal caltién la pena pa dos de los cinco acusaos d'esplotar illegales que trayíen a España

UVIÉU/XIXÓN, 21 de Mayu (EUROPA PRESS)

La Estaya Tercera de l'Audiencia Provincial d'Asturies, n'Uviéu, acoyó esti miércoles la última sesión del xuiciu contra cinco persones, dos asturianes y trés hermanos de nacionalidá guatemalteca, ente ellos una relixosa de Ribesella, por esplotar llaboralmente a inmigrantes que trayía de manera irregular a España. La Fiscalía caltuvo la pena solicitada pa dos d'ellos y rebaxóla nel casu de los otros trés, al reconocer los fechos, confirmaron fontes xurídiques a Europa Press.

Nesti sen, nel casu de Y.F.M., de M.D.C.C., defendida por José Gonzalo Bembibre, y de M.Y.P.S., representada pol abogáu José Manuel Fernández González, la Fiscalía solicitó a lo último dos años de prisión, anque nel últimu casu, aceptó cambiar la pena de cárcel por una multa. Caltiénse sicasí'l pidimientu de seis años y un mes de prisión pa M.F.M. y B.F.M., --defendíu por Luis Manuel Valle Gómez--, pol delitu contra los derechos de los ciudadanos estranxeros.

Coles mesmes, hai un sestu acusáu, J.A.F.M., de nacionalidá guatemalteca y empadronáu n'Ardines (Ribesella), hermanu de la mesma de los trés imputaos d'esa mesma nacionalidá, que s'alcuentra en paraderu desconocíu. Nesti casu, la Fiscalía interesa que lu xulguen aparte una vez que lu alcuentren y lu pongan a disposición xudicial por esta causa.

RELATU FISCAL

Según el relatu fiscal, los cuatro hermanos contactaben con xente del so país, a los que facilitaben los billetes d'avión, dándo-yos instrucciones sobre'l so comportamientu na frontera pa que pudieren entrar como turistes y recoyéndolos a la so llegada a Asturies. Estes actividaes llevábense a cabu n'ocasiones a cambiu del pagu de delles cantidaes, con una media d'unos 1.500 euros.

Ente otres coses, encamentábase-yos a que traxeren una cantidá determinada de dineru pa nun llevantar sospeches na frontera sobre la so solvencia y indicábase-yos que viaxaren con poca ropa, y comentaren que veníen a Asturies a visitar la Virxe de Cuadonga pa facese pasar por turistes.

TRABAYU "SIN DESCANSU"

Una vez n'Asturies, treslladábenlos a cases particulares del Oriente asturianu, sobremanera de Ribesella, pa que trabayaren como emplegaes del llar o al cuidáu de persones dependientes o neños, "baxo condiciones abusives". Algunes de les víctimes trabayaron atendiendo al home d'una de les acusaes, que ye tetrapléxicu, y llimpiando la casa, llabor pola que cobraríen 600 euros al mes.

Nesti sen, una de les víctimes tuvo trabayando nesta casa dende'l 25 d'avientu del 2007 hasta agostu del añu 2008, mientres les 24 hores, tolos díes de la selmana "sin descansu". Coles mesmes, l'acusada nun la dexaba salir llibremente sola de la casa y nun la dexaba falar a soles cola so familia nin coles vecines, amás de quita-y el pasaporte, que sólo-y entregaba cuando diben al bancu pa enviar dineru al so país.

Puesto que la víctima nun sabe lleer nin escribir, l'acusada acompañábala al bancu a enviar el dineru al so país cuando cobraba'l so salariu, únicu momentu en que-y devolvía'l pasaporte. Amás, la imputada alvirtió-y de que si contaba algo, echábala d'España porque l'acusada tenía dos fíos que yeren policíes y lo fairíen.

Ante esta amenaza, la muyer aguantó na casa porque nun quería que la estraditaren al pidir pa venir a España un préstamu de 35.000 quetzales (3.500 euros) col que fcaer frente a los gastos del viaxe, lo que lu obligaba a devolver la cantidá y los intereses. N'agostu del 2008, l'acusada informó-y que cuando llegara otra moza podía marchar, momentu nel que-y devolvió les sos pertenencies y dexóla colar.

L'acusada repitió la mesma operación cola nueva asistenta, que trabayaba sin descansos. Sicasí, nun momentu de descuidu, la muyer, que tuvo trabayando neses condiciones mientres ocho meses, pudo acudir a la Policía a denunciar la situación.

N'otru de los casos, cuando una de les víctimes, actual testigu protexíu, vivía na casa del acusáu B.F.M., contactó cola acusada D.C.C., que la tuvo trabayando nel so establecimientu de llavandería industrial, asitiáu na planta baxa de la so casa, dende agostu hasta payares del añu 2009.

A sabiendes de nun tenía permisu de trabayu y residencia; abusando d'esta circunstancia y de la situación de necesidá de la moza estranxera, impúnxo-y un horariu llaboral de 8.00 a 00.00 hores, solamente interrumpíu por una pausa pa comer, incluyendo sábados y domingos, pa dempués pasar a trabayar, a partir de payares, de 8.00 a 19.30 hores, por un sueldu de 800 euros al mes sin contratu de trabayu nin derechu a Seguridá Social.