Foru Asturies y PP ruempen les negociaciones por falta d'acuerdu

UVIÉU, 14 de Xunu (EUROPA PRESS)

Foru Asturies y el PP rompieron les negociaciones p'algamar un pactu sobre la composición de la Mesa de la Cámara al nun algamar un acuerdu de llexislatura pa garantizar la "gobernabilidá" d'Asturies.

Dende'l partíu lideráu por Francisco Álvarez-Cascos reprocharon que'l PP centrara l'alcuentru n'algamar la Presidencia de la Xunta Xeneral. Pa los diputaos de Foru Asturies, Cristina Coto y Pelayo Roces, les negociaciones teníen qu'afondar nes necesidaes sociales, económiques y institucionales de la comunidá y non en poner "a una determinada persona nun determináu cargu", en referencia a la Presidencia de la Xunta.

Por ello, Foru Asturies refugó la propuesta del PP, qu'incluyía la Presidencia del parlamentu pa los 'populares', l'apoyu del Partíu Popular a los candidatos de Foru Asturies pa la vicepresidencia y la secretaría de la Xunta, y l'apoyu esplícitu, colos sos votos, a la elección de Francisco Álvarez-Cascos como presidente d'Asturies.

L'acuerdu propuestu pol PP y refugáu por Foru Asturies, tamién incluyía'l compromisu d'ambos partíos pal entamu de conversaciones p'algamar un pactu de llexislatura que garantice la estabilidá y gobernabilidá d'Asturies sobre la base d'un programa común y "la forma de llevalo a cabu".

Pela so parte, el PP refugó la propuesta de Foru Asturies no relativo al pactu de llexislatura, dao que que pa la candidata del PP a la Presidencia, Isabel Pérez-Espinosa, trátase d'un "cheque en blancu", de "puntos xenerales" nos que nun se detalla'l programa.

Pérez-Espinosa caltién que dende'l PP ofrecíase una "propuesta xenerosa" na que garantizaben la elección d'Álvarez-cascos como presidente autonómicu y comprometíense a entamar conversaciones pa establecer el programa de gobiernu que va aplicase nos próximos cuatro años".

Según indicó a los medios de comunicación Pérez-Espinosa, el PP "nun pue firmar" el documentu propuestu por Foru Asturies pa un acuerdu de llexislatura, "nel que simplemente se fala d'unes llinies xenerales sin concretar nengún aspectu".

La candidata del PP a la Presidencia faló " directamente" con Álvarez-Cascos y díxo-y que la propuesta del PP ye "pública" y "suficiente" pa garantizar la presencia del PP y Foru Asturies na Mesa de la Xunta, asina como la elección del propiu Cascos como presidente. "Naide va poder achacar al PP que teamos atrabancando que la fuerza política que llogró más votos nes pasaes elecciones seya la que presida'l Gobiernu autonómicu", remarcó.

Pela so parte, Cristina Coto llamentó que na xunta nun se trataren los 14 puntos de la propuesta d'acuerdu de llexislatura redactada por Foru Asturies porque "too xiró sobre la Presidencia de la Cámara".

"Nosotros queríamos facer algo más serio y más estable pal futuru d'Asturies. Ye güei'l PP el que pidió un cheque en blancu a la sociedá asturiana, dao que paez que'l centru de la cuestión yera poner a una determinada persona nun determináu cargu, que yera la Presidencia de la Cámara", afirmó Coto.

Coles mesmes, Pelayo Roces calcó en que Foru Asturies tien "bien clara" la so fueya de ruta que pasa per un acuerdu de llexislatura que "diba muncho más allá de lo que ye un puestu na Xunta Xeneral d'Asturies", al tiempu que criticó que la persona que compareció ante los medios ye "precisamente la que nun tuvo na xunta", en referencia a Espinosa.

Coles mesmes, ambos partíos dieron por rotes les negociaciones pasaes les 23.30 hores. La xunta, qu'empezó a les 21.00 hores d'esti martes --tres una xunta previa a les 19.00 hores-- dexa nel aire la composición de la Mesa de la Cámara, qu'entama la so sesión constitutiva esti miércoles a les 12.00 hores cola presencia de los 45 diputaos que componen el parlamentu, 16 de Foru Asturies, 15 del PSOE, 10 del PP y 4 d'IU Verdes.

Dende Foru Asturies caltienen, pel momentu, la decisión del so Grupu Parlamentariu de proponer la candidatura d'Enrique Álvarez-Sostres a la presidencia de la Xunta Xeneral. El Grupu, que va reunise esti miércoles otra vuelta a les 10.30 hores, propón tamién a Pelayo Roces y Cristina Coto como candidatos a la vicepresidencia y secretaria de la Cámara, respectivamente.