La FSA afirma nun tener deudes con bancos nin proveedores y tacha de "miserables" les acusaciones de Podemos

UVIÉU, 22 de Xineru (EUROPA PRESS)

La Federación Socialista Asturiana negó esti vienres tener robláu nengún préstamu bancariu nin contrayida nenguna deuda con proveedores y dexó bien claro que "dispón d'aforros y patrimoniu". Tachó de "miserables" les crítiques nesti sen del diputáu de Podemos Asturies, Enrique López.

Nuna nota de prensa, los socialistes salieron al pasu "de les falses y insidioses declaraciones de Podemos al respective de la deuda de la FSA-PSOE y refuga dafechu, por miserables, les acusaciones del diputáu Enrique López".

La FSA-PSOE afirmó que pue presumir del so balance y que "foi posible gracies a una xestión austera y responsable". "Resulta malo de dixerir qu'una persona como'l citáu diputáu de Podemos, que ta somorguiáu nun procesu xudicial por una presunta agresión a un policía, venga a danos llecciones dada la so dudosa catadura moral y ética", añadió.

Recordó amás que la formación morada "día tres día vemos cómo apaez implicada n'escándalos nos que se vinculada la so financiación con dictadures como la venezolana o la iranina. Tampoco podemos escaecer que'l líder de Podemos, Pablo Iglesias, ablúcanos colos sos cuantiosos aumentos patrimoniales dende que ta al mandu de la organización".

La FSA-PSOE pregunta si "en Podemos consideren tamién exemplu de moralidá'l vergoñosu capítulu de les ayudes a la tesis de Daniel Ripa". "Exemplos toos ellos que demuestren qu'en Podemos Asturies, cuando nun tienen argumentos y acusen sin escrúpulos nin prebes, tán evidenciando que nun tienen el más mínimu nivel de la moral y de la ética política. Lo único no que sí tán bien preparaos ye en calumniar con mala saña", acabó la nota.