Gerard Butler volverá ser Leónidas na secuela de '300'

LOS ÁNXELES, 13 de Setiembre (EUROPA PRESS)

Gerard Butler va volver metese na piel del bravu rei espartanu Leonidas, pa la secuela de '300' que, pel momentu, va llevar el títulu de '300: Battle of Artemisia'.

Vien falándose de la so secuela dende que '300' de Zack Snyder, l'adaptación de l'aclamada novela gráfica de Frank Miller basada na Batalla de les Termópiles, tornara nún de los éxitos de taquilla más sonaos de los últimos años y marcara un antes y un dempués na estética del cine épicu. Aquello foi nel 2006, y munches vueltes dio'l proyectu dende aquélla.

Nun primer momentu la secuela titularíase 'Gerges' y centraríase na figura del rei persa y la so campaña nel continente, tres vencer na foz de les Termópiles a los temibles 300 espartanos de Leónidas.

Pero nel nuevu enfoque de la historia, que tamién tien al rei persa como exe fundamental, la cinta va abarcar dellos años dende que Jerjes ocupa'l tronu tres la muerte del so padre Darío I hasta la Batalla d'Artemisa, el culmen del filme y que tien llugar nos mesmos años nos que se produxo la Batalla de les Termópiles.

Un paralelismu temporal qu'abre la puerta al remanecimientu non sólo de Leónidas na película, sinón tamién de la so muyer (Lena Headey). Posibilidá que confirmó'l productor de 300 de la so secuela, Bernie Goldmann. "Ye una historia distinta. Hai un pequeñu papel pa Lena y hai un pequeñu papel pa Gerry", reveló.

Nada reveló'l productor sobre'l restu de nomes del casting, anque dexó claro que nun va haber grandes estrelles como protagonistes, yá que, según el so criteriu, esto résta-y interés a les películes históriques.

"Cuando faes una película d'época como ésta, ye xenial nun conocer los actores. Nun pue vese a Tom Cruise nuna película histórica. Pensaríes mientres tola película ¡Èsi ye Tom Cruise!", señaló'l productor de la cinta que va tar dirixida por Noam Murro (Smart People) y que va estrenase nel 2013.