El Gobiernu asturianu diz que reformar l'Estatutu ye una iniciativa de la Xunta Xeneral y de los grupos parllamentarios

UVIÉU, 18 Sep. (EUROPA PRESS) -

El conseyeru de Presidencia y Participación Ciudadana, Guillermo Martínez, mostró l'apoyu a la iniciativa del Pedro Sánchez de reformar la Constitución pa desaniciar aforamientos. Con too, sobre reformar l'Estatutu pa tratar esi tema n'Asturies, indicó que ye una decisión que depende de la Xunta Xeneral y de los grupos parllamentarios.

En respuesta a los medios de comunicación depués de la presentación del 'Protocolu contra la violencia sexual nel Principáu', el portavoz del Gobiernu de Javier Fernández aseguró que tolo que valga p'avanzar en rexeneración democrática "va cuntar col apoyudel Principáu".

Guillermo Martínez afirmó que'l Gobiernu asturianu ta d'alcuerdu con la midida de rexeneración democrática planteada por Sánchez por que se trate de forma "global", y entiende que supón "una meyora" a la espera de ver cómo se concreta.

Amás, el conseyeru resaltó l'aprobación de recién nel parllamentu autonómicu de la Llei de Tresparencia, Bon Gobiernu y Grupos d'Interés, que calificó de norma "perimportante" y espera contribuya a qu'Asturies s'asitie como una de les comunidaes "a la cabeza" de la rexeneración democrática.

Sobre la posibilidá de reformar l'Estatutu d'Autonomía pa tratar los aforamientos n'Asturies, el conseyeru incidió en que na comunidá esa decisión depende de la Xunta Xeneral y de los grupos parllamentarios.