Gobiernu y sindicatos alcuerden xubir el SMI de 2024 un 5%, hasta los 1.134 euros

MADRID, 12 Ene. (EUROPA PRESS) -

El Ministeriu de Trabayu alcordó esti vienres con CCOO y UGT xubir el salariu mínimu inteprofesional (SMI) pa 2024 un 5%, dende los 1.080 euros mensuales por catorce pagues hasta los 1.134 euros. Esta xubida va aplicase con efectos retroactivos dende'l 1 de xineru de 2024.

Asina lo anunció'l secretariu d'Estáu de Trabayu, Joaquín Pérez Rey, al acabar la xunta que celebró a primer hora d'esta mañana colos axentes sociales pa comunica-yos la decisión del Gobiernu sobre'l SMI depués de les conversaciones calteníes con ellos dende'l mes d'avientu.

Les organizaciones empresariales CEOE y Cepyme nun se sumaron al alcuerdu alegando que nun s'atendieron les sos demandes d'indexar el SMI a los contratos públicos y d'establecer bonificaciones pal sector del campu.

Tanto Trabayu como CCOO y UXT taben dispuestos a firmar una xubida del 4% si les organizaciones empresariales se sumen a un pactu tripartitu. En casu de nun facelo, el Ministeriu y los sindicatos aseguraron que la xubida diba ser "más ambiciosa" qu'esi 4% inicial.

Los sindicatos taben pidiendo xubir el SMI de 2024 un 5%, 54 euros perriba de los 1.080 euros de 2023. Esa foi finalmente la xubida alcordada.

A principios del añu pasáu, el Gobiernu alcordó, namás colos sindicatos, una xubida del SMI del 8% pa 2023. El so compromisu pa esta llexislatura ye fixar, por llei, qu'esta renta mínima siempre tien que ser equivalente al 60% del salariu mediu.

La CEOE tampoco nun se sumó a les xubíes del SMI de 2022 y 2021 alcordaes pol Gobiernu de Pedro Sánchez con CCOO y UGT, pero sí pactó con ellos la medría de 2020, cuando aumentó dende los 900 a los 950 euros mensuales.