González diz que ye imposible gobernar per Twitter énte un Barbón que diz que'l so usu permite "defender la democracia"

UVIÉU, 26 Oct. (EUROPA PRESS) -

L'ex presidente de Gobiernu del PSOE, Felipe González, faló esti xueves n'Avilés del impactu de les redes y les tecnoloxíes nueves y lo qu'ello supón pa la llibertá d'espresión y alvirtió que ye "imposible gobernar per Twitter".

"Güei los líderes políticos gobiernen a golpe de Twitter y una vez que llancen el tuit, ehí ta, les consecuencies yá nun son reparables, anque hai dalgunos que creen que puen reparar porque borren tol so historial", dixo Felipe González, qu'indicó que, sicasí, la so esperanza ye que la condición humana va prevalecer a la rede y a la intelixencia artificial.

Llamentó'l expresidente qu'agora, por culpa de les redes tenemos "más inquisidores que nunca" y anque na actualidá "espresase con llibertá ye más fácil, espresase con conocimientu ye cada vez más difícil".

BARBÓN DEFENDE L'USU DE LES REDES

Sobre les redes sociales y lo que les mesmes suponen pa la llibertá d'espresión tamién faló nesa mesma mesa redonda'l presidente del Principáu, el socialista Adrián Barbón, que defendió'l so usu.

"¿Güei un políticu podría ganar elecciones ensin redes sociales? De xuru que sí. Agora, la cuestión ye, por qué vamos arrenunciar a un preséu qu'otros tán utilizando pa debilitar la democracia cuando nós, munchos, la mayoría, podemos utilizalo pa defendela", dixo Barbón.

Indicó Barbón que nes redes "se funciona muncho más por emociones que por razones y eso ye dalgo que m'esmolez, porque pudiendo convertise nun espaciu pa la reflexón, les grandes reflexones malapenes existen".

"Yo creo que güei ún de los grandes males, de les grandes amenaces, precisamente, a la democracia, ye la perversión del usu de les redes sociales que se convierten nuna degradación permanente. Y les redes puen utilizase en coses mui bones y puen utilizase en coses mui males. Esto ye, les grandes campañes güei de desprestixu, non yá digo de la política, digo polo xeneral, del propiu sistema democráticu, tán nes redes", dixo.