Iniciativa considera de "nivel de chigre" la postura de Gázquez (PP) cola especialidá d'asturianu

UVIÉU 7 Oct. (EUROPA PRESS) -

Iniciativa pol Asturianu calificó de "nivel cutre, llamentable y de chigre" la intervención nel Congresu de la diputada 'popular' Paloma Gázquez contra l'aprobación de la especialidá docente de Llingua Asturiana y Lliteratura, una midida que, recuerden, foi un compromisu electoral del PP.

Esti miércoles, la Comisión d'Educación y FP del Congresu aprobó, colos votos a favor de tolos grupos menos PP, Vox y Ciudadanos, una proposición non de llei del Grupu Parllamentariu Confederal d'Unidas Podemos-En Comú Podem-Galicia en común, pola que s'encamienta al Gobiernu a reconocer y crear la Especialidá Docente del Profesoráu de Llingua Asturiana y Lliteratura.

El PP votó en contra y la diputada Paloma Gázquez destacó que "el bable nun ye uniforme en tol territoriu" y que'l 90% de los asturianos refuga la oficialidá porque "nun se fala na cai, nenyures" y por eso, la iniciativa d'Unidas Podemos "tendría sentíu si hubiera demanda". "Pero ye que baxa cada añu", alvierte.

Iniciativa pol Asturianu llamentó esta postura de la diputada del PP, porque la especialidá docente supón "respetar los drechos llaborales de los profesores". Amás, recuerden que la so aprobación foi un compromisu del PP nel añu 2012 y llegaron a votar a favor de la so aprobación na Xunta Xeneral.

"Axuntar el debate de la oficialidá con una medida que va a meyorar les condiciones llaborales de los y les docentes resulta mezquín y falaz", indicaron sobre la postura de Gázquez, p'añadir que "si Mercedes Fernández llogró llegar al límite del absurdo col asturianu, Gázquez consiguió superalo ayeri na Cámara Baxa pa llegar a un nivel cutre, llamentable y de chigre".