Iniciativa pol Asturianu abre la matrícula de los nuevos cursos d'asturianu a distancia

INICIATIVA POL ASTURIANU

   UVIÉU, 14 Abr. (EUROPA PRESS) -

   Iniciativa pol Asturianu abre'l procesu de matrícula d'una nueva convocatoria de cursos d'asturianu a distancia, que van desarrollase al traviés d'una plataforma dixital, dende'l 28 d'abril al 11 de xunetu, lo qu'equival a 50 hores llectives.

   Según esplica la organización en nota de prensa, la formación va dividíse en 25 hores de tutoríes a distancia -de manera obligatoria-, otres 20 de trabayu autónomu y 5 hores complementaries que va proponer el tutor/tutora, con una prueba al final de la formación.

   "La modalidá a distancia favorez la autoorganización del alumnáu y permite-yos dir faciendo les actividaes, de manera más conveniente", señalen desde Iniciativa pol asturianu.

DOS GRUPOS P'APRENDER ASTURIANU

   Pal desendolcu del cursu van proponese dos grupos: los martes a les 17:00 hores o los xueves a les 16:30 hores. La participación nestes tutoríes telemátiques ye obligatoria.

   Va ofrecese un nivel inicial que ta empobináu "a persones ensin formación d'asturianu o con nivel baxu de conocencia". Los estudiantes que superen el cursu van algamar una acreitación de l'Academia de la Llingua Asturiana que certifica una formación d'asturianu. Nun se pue acceder al títulu de nivel II ensin previamente cuntar col títulu I.

   El preciu de la matrícula ye de 75 euros, y les persones asociaes a Iniciativa pol Asturianu van beneficiase d'un descuentu del 20%, y tal y como esplica la asociación, "toles persones interesaes puen asociase nel momentu de la matrícula y disfrutar d'esti descuentu".

   Les inscripciones pal cursu puen cubrise nun formulariu na propia páxina web d'Iniciativa pol Asturianu, onde tamién s'alcuentren toles condiciones pal mesmu.