Iniciativa pol Asturianu llamenta la muerte d'Antonio Trevín, "un exemplu de defensa de la oficialidá"

   UVIÉU, 24 Jul. (EUROPA PRESS) -

Iniciativa pol Asturianu súmase a les muestres de pena al conocer el fallecimientu d'Antonio Trevín Lombán, ún de los primeros dirixentes de la FSA-PSOE qu'apostó claramente pola oficialidá a mediaos de los noventa y que "mostró siempres una defensa del patrimoniu llingüísticu", según recuerden.

   Trevín, que foi presidente del Gobiernu del Principáu d'Asturies ente los años 1993 y 1995, reconoció, ente otres coses, "la difícil situación del idioma pola perda de falantes". "Foi de los primeros conceyales en xurar el so cargu n'asturianu na corporación llanisca", apunta la organización.

   L'ex-alcalde de Llanes y ex-presidente del Gobiernu asturianu recordaba tamién nos debates sobre esta cuestión y n'entrevistes que la previsión constitucional sobre les llingües yera mui clara y siempres insistía nel mandatu sobre les llingües que recueye la Carta Magna tal y como diz Iniciativa.

   Pa ellos, Trevín "trató siempres de quitar prexuicios sobre la oficialidá dientro del so partíu y tamién dende la sociedá civil". Collaboró como patronu de la Fundación Caveda y Nava, coleutivu apartidista que, demientres una década, dedicóse a consiguir nuevos consensos sobre la oficialidá de les llingües propies.

   Nel mes de mayu de 2019, participó xunto con otros dirixentes políticos, nel II Seminariu 'Oficialidá, el camín constitucional de futuru pal asturianu', dedicáu a "Reflexones y casos d'ésitu", nel que cola so habitual amabilidá Antonio Trevín fizo un apueste por un modelu d'oficialidá propiu p'Asturies apuntando que "la falta d'oficialidá ye un problema colectivu d'identidá".

   Tamién foi autocríticu reconociendo erros nel trabayu y al mismu tiempu tratando de buscar soluciones y puntos d'alcuentru na política llingüística. Amás, foi ún de los diputaos nes Cortes qu'acoyó con más ilusión la propuesta d'Iniciativa pol Asturianu pa incluyir una partida nos Presupuestos Xenerales del Estáu pa l'Academia de la Llingua Asturiana, fechu qu'ocurrió per primer vegada nel añu 2020.

   Nes sos redes sociales compartía tolos díes poemes n'asturianu con delles imáxenes de Llanes demostrando d'esta manera l'apegu que-y tenía a la lliteratura n'asturianu. Poro, Iniciativa pol Asturianu espresa'l más sentíu pésame a la so familia, collacios y a tolos compañeros de la FSA-PSOE. "El recuerdu del presidente Trevín va siguir ente nós como un exemplu de defensa de la oficialidá dende'l respetu, l'alcuentru y ensin esclusiones", mencionen.