Iniciativa pol Asturianu pide un director pa la RTPA que refuerce la presencia del asturianu

   OVIEDO, 20 Ene. (EUROPA PRESS) -

   Iniciativa pol Asturianu ve la dimisión del director de la RTPA, Francisco Orejas, como "un momentu clave pa demostrar el sofitu de los partíos a la normalización y a la presencia del asturianu nos medios de comunicación públicos". Nesti periodu, la Xunta Xeneral tien que nomar un nuevu director de la radiotelevisión pública asturiana.

   Dende la organización espliquen qu'esti oxetivu apaez yá nel Estatutu d'Autonomía de 1981 y na propia Llei d'Usu y Promoción del Asturianu de 1998 y na Carta Europea de les Llingües Rexonales o Minoritaries, ratificada pol Estáu español en 2001.

   Amás, añaden que los propios principios rectores del ente públicu asturianu reflexen claramente esta cuestión. "L'añu pasáu aprobóse'l Mandatu Marcu, que establece precisamente una mayor presencia de les llingües propies d'Asturies nes emisiones de la radiotelevisión pública. Sicasí, dende entós nun se vieron pasos alantre significativos", comenten.

   Pa Iniciativa pol Asturianu resulta evidente que los avances nesti ámbitu van dase con mayor facilidá si la persona que tea al frente de la RTPA sea una persona con sensibilidá cola normalización llingüística y con conocimientu de la realidá sociollingüística asturiana.

   Amás, por supuestu, de contar con un proyectu que vincule la realidá asturiana a esti mediu informativu. "La llingua asturiana precisa de manera urxente contar con una mayor presencia en tolos medios, tanto na televisión como na radio y n'Internet, y ye equí onde la radiotelevisión pública tien d'aumentar la so presencia", diz la organización.

   Iniciativa pol Asturianu esixe que esti seya un procesu tresparente y nel que se tengan en cuenta de manera destacada los méritos llingüísticos, yá que ún de los oxetivos principales nuna comunidá onde esisten dos llingües propies tien de ser, sobre too, la presencia de la llingua propia y la so normalización social.

   Per otra parte, l'asociación entamará un ciclu de contactos colos partíos políticos del parllamentu asturianu pa amosar la so postura y conocer los sos oxetivos, teniendo en cuenta la importancia d'esta cuestión.