Publicado 08/01/2015 13:12CET

Iniciativa pol Asturianu pide que se tramiten los convenios de los Servicios de Normalización Llingüística

UVIÉU, 08 de Xineru (EUROPA PRESS)

L'asociación Iniciativa pol Asturianu pidió esti xueves a la Conseyería de Cultura y a los conceyos implicaos que se responsabilicen de la situación de los servicios de normalización llingüística y tramiten los convenios necesarios pal so funcionamientu.

Nuna nota prensa, l'asociación mostraba la so solidaridá cola Asociación de Trabayadores de la Normalización, qu'esta selmana espresaben "la murnia situación que viven los servicios de normalización llingüística puestos en marcha dende va más d'una década en dellos conceyos asturianos".

"Dende Iniciativa pol Asturianu solidarizámonos con estos trabayadores y pidimos tamién una situación estable de los servicios que permitan llevar a alantre polítiques llingüístiques organizaes y continuaes nel tiempu", apunta'l colectivu.

Añade amás qu'estes instituciones "son perimportantes pa la normalización de la llingua asturiana, yá que cada añu miles de ciudanos y cientos d'entidaes públiques y privaes, usen estos servicios pa sofitar l'apueste pol usu del asturianu na so actividá".

Ye por ello que piden a la Conseyería de Cultura, "responsable de les competencies de Política Llingüística, que ponga en marcha los convenios necesarios pa caltenelos nel tiempu, y a los conceyos, que se responsabilicen de los servicios de normalización como parte propia que son de la so alministración, destinando los recursos necesarios pa llevar alantre la so actividá ensin una dependencia absoluta de la financiación del Gobiernu d'Asturies, como pasa na mayor parte de los casos".

Asturianu ofrecido por