Iniciativa pol Asturianu reclama la retramitación del Plan Llingüísticu de Xixón "con toles garantíes"

   UVIÉU, 9 May. (EUROPA PRESS) -

   Iniciativa pol Asturianu afala al Gobiernu del Conceyu de Xixón a la retramitación del Plan de Normalización Llingüística "con toles garantíes técniques y llegales pa siguir avanzando na normalización social del idioma".

   Pa esta organización, el Plan agora baltiáu da continuidá a los planes anteriores. Foi aprobáu nel Plenu municipal d'agostu de 2024 col votu favoratible de tola corporación municipal sacante Vox.

   Ye por esto que consideren que la sentencia, contra la que cabe recursu, "nun entra nel conteníu del Plan de Normalización Llingüística de Xixón y únicamente fai referencia a cuestiones técniques y de procedimientu".

   En concreto, refierénse a la falta d'informe económicu, falta de consulta previa, falta de publciación nel portal web y ausencia de publicación de memories normatives, asina como falta d'intervención de la Xunta de Gobiernu del conceyu ensin incluyise nel plan normativu anual.

   Iniciativa pol Asturianu considera qu'esta midida supón "un nuevu ataque a los drechos de los falantes y la llibertá d'usu del asturianu, amás d'un intentu de bloquiar les polítiques de normalización del idioma".

   La entidá recuerda que la única garantía llegal pa defender los drechos de los faltantes d'asturianu y de gallego-asturianu ye la oficialida y anima a tola ciudadanía a participar na manifestación d'esti sábadu n'Uviéu.