Iniciativa señala los "nulos avances" na presencia del asturianu nos servicios dixitales del Consorciu de Tresportes

   UVIÉU, 22 May. (EUROPA PRESS) -

   Iniciativa pol Asturianu reclamó esti xueves "un compromisu claru cola normalización de les llingües propies y col cumplimientu de la Llei d'Usu y Promoción del Asturianu" al Consorciu de Tresportes d'Asturies, que sigue ensin disponer del asturianu na so páxina web y na aplicación pa dispositivos móviles 'Conecta', dos años dempués d'entamar a furrular.

   Según espliquen n'una nota de prensa, Iniciativa pol Asturianu contactó fae dos años, nel momomentu del so llanzamientu, cola Conseyería de Mediu Rural y Cohesión Territorial, responsable nesi momentu de l'aplicación, pa reclamar la presencia de les llingües propies.

   Nesi momentu, el departamentu comprometióse a incluyir l'asturianu ente les llingües disponibles nel serviciu, "cuestión que dos años después sigue pendiente", tal y como detallen.

   La entidá de reivindicación llingüística considera "imprescindible" que l'asturianu y el gallego-asturianu tengan presencia nel portal web y na aplicación de la plataforma y "llamenta los nulos avances nesti serviciu per parte de l'alministración".

   Na so opinión, "una entidá con naturaleza d'ente públicu como ye'l casu del Consorciu de Tresportes d'Asturies tien que xugar un papel importante na normalización social del idioma asina como na so visibilidá".

   Xunto a esto, recuerden "la esistencia d'unos criterios de llinguaxe alministrativu en llingua asturiana que'l Conseyu de Gobiernu del Principáu d'Asturies publicó l'añu pasáu pa fomentar l'usu del idioma n'Alministración Pública"

    El documentu recueye que "les páxines web, aplicaciones y el restu de les ferramientas informátques institucionales del sector públicu procurarán cuntar con una versión n'asturianu". Amás, diz que "nes páxines web de nueva creación tendráse en cuenta qu'al menos los sos conteníos estáticos seyan billingües, en castellán y asturianu", añeden.