L'abertura del tramu Outur-Vil.lapedre completa la metá occidental de l'Autovía del Cantábricu n'Asturies

UVIÉU, 16 d'Avientu (EUROPA PRESS)

El tramu de 9,3 kilómetros de l'Autovía del Cantábricu (A-8) ente Outur y Vil.lapedre quedó esti llunes abiertu al públicu, nun actu nel que tomaron parte la ministra de Fomentu, Ana Pastor, y el presidente del Gobiernu asturianu, Javier Fernández. Con esta inauguración complétase la metá occidental de l'autovía n'Asturies, y namás resta'l trazáu ente Pendueles y Unquera, nel so estremu oriental p'acabar la obra.

Al traviés d'una nota prensa, el Ministeriu de Fomentu señaló que "pa los 12.000 vehículos que de media circulen diariamente per esti tramu de la N-634 representa una importante meyora na comodidá, velocidá y seguridá de conducción, al evitar el trazáu de l'antigua carretera y el pasu peles travesíes d'Outur y Vil.lapedre".

El presupuestu de la obra Outur-Vil.lapedre de l'autovía A-8 sube a 67,18 millones d'euros, cantidá que sumada al costu de redacción del proyectu, al importe estimáu de les espropiaciones y al costu de l'asistencia técnica pal control y vixilancia de la obra ofrez una inversión total de 76,20 millones d'euros.

"PRONTO", COMPLETU'L TRAZÁU GALLEGU

El Ministeriu de Fomentu afirmó, nuna nota de prensas, que "ta apostando firmemente pola autovía A-8, fundamental pa la vertebración del cordal cantábricu y la so conexón con Europa central". A esti tramu, qu'entra güei en serviciu, van sumase pronto los dos que resten pa completar l'autovía A-8 en Galicia, momentu nel que podrá circulase íntegramente per esta vía dende l'estremu Oriental d'Asturies (Llanes, Pendueles) hasta A Coruña, pasando per Xixón. Coles mesmes, trabáyase con intensidá nel tramu ente Unquera y Pendueles, n'Asturies, que va permitir completar l'A-8 hasta Cantabria.

El tramu pasa al traviés de los conceyos de Valdés y Navia.
La Estaya tresversal de l'autovía consta de dos calzaes, una pa cada
sentíu de circulación, con dos carriles de 3,5 m, arcenes
esteriores de 2,5 m ya interiores de 1,5 m, separaos por una mediana d'anchor variable ente 1 y 3 m.

El trazáu escurre en variante de trazáu hacia'l Sur de l'antigua carretera N-634, evitando les travesíes de les poblaciones d'Outur y Vil.lapedre. Existen dos enllaces, ún en cada estremu del tramu: el de Vistalegre, que conecta cola antigua N-634, y el del enllaz de La Polavieya, yá en serviciu parcialmente dende'l pasáu ochobre, y que conecta cola carretera autonómica NV-5.

La carretera N-634 va caltener, según Fomentu, una función d'exe vertebrador de los espardíos núcleos de población de la comarca, tales como L.luarca, Santiago, Outur o Vil.lapedre, qu'al
traviés de los dos enllaces mentaos van tener accesu a l'autovía. Como obres más destacables cabe mentar el túnel d 'El Rel.lón (290 metros), el túnel d'El Faru (155 metros) y el viaductu de Barayu, (592 metros y un altor máximu de pila de 62 metros).