UVIÉU, 4 Feb. (EUROPA PRESS) -
L'Academia de la Llingua Asturiana y el Conceyu de Xixón firmaron un conveniu nuevu, ensin naturaleza económica, onde se recueye la collaboración na normalización social del asturianu y l'asesoramientu llingüísticu de l'Academia al Conceyu.
Dambes instituciones principiaron la llexislatura con un alcuentru ente los sos máximos representantes onde pudieron repasase y valorase los últimos avances na normalización social del asturianu dientro de l'acción del Conceyu. Naquella mesma ocasión, estudiárense delles propuestes pa desendolcar a lo llargo del ciclu políticu actual y pactaren les bases del documentu que ta acabantes de zarrar el so procesu de tramitación.
La collaboración, que nun tien naturaleza económica, supón l'asesoramientu de l'Academia de la Llingua Asturiana al Conceyu y la coordinación ente dambes entidaes na política de normalización social.
Otra manera, l'Academia caltién el so representante nel Conseyu Asesor de la Llingua y va tar representada tamién nos xuraos y premios lliterarios convocaos pol Conceyu de Xixón pa la promoción del asturianu.
Amás, el Conceyu de Xixón comprometióse a siguir completando la rotulación n'asturianu de los sos servicios y dependencies, asina como de la rede viaria del Conceyu, igual na zona urbana que na rural.
Per otru llau, l'Academia, a pidimientu del Conceyu, va ufrir propuestes normatives nesti ámbitu y va aconseyar y revisar el trabayu de recoyida de la toponimia xixonesa pa la edición de los cartafueyos de les 19 parroquies qu'entá queden por estudiar.
