Les nueves ayudes al teatru profesional van premiar l'usu del asturianu

   UVIÉU, 21 May. (EUROPA PRESS) -

   La Conseyería de Cultura, Política Llingüística y Deporte aprobó les bases que van regular la repartida de les ayudes pa la producción d'actividaes escéniques desenvueltes por empreses privaes y grupos de teatru profesional con see n'Asturies. Los criterios premien, ente otres coses, l'usu del asturianu y del gallego-asturianu.

   Una de les principales novedaes ye la posibilidá de solicitar el pagu antemanáu de les ayudes concedíes, una midida anunciada pola conseyería pa esta llexislatura coles mires de facilitar la planificación y el desenvolvimientu del sector cultural.

   Estes ayudes, que van otorgase en réxime de concurrencia competitiva, tienen como finalidá fomentar la creación, adaptación y desenvolvimientu de montaxes escénicos de calter profesional, pa contribuyir al afitamientu del texíu cultural asturianu por aciu la collaboración directa con compañíes, productores y profesionales del sector.

   Les nueves bases incorporen criterios d'evaluación actualizaos, qu'estremen ente compañíes con más o menos de cinco años de trayectoria. Van valorase aspeutos como l'interés artísticu del proyectu, la participación de profesionales asturianos, la coproducción, la perspectiva de xéneru y l'usu del asturianu o'l gallego-asturianu. Coles mesmes, va tener en cuenta la viabilidá económica de la propuesta y el grau de profesionalización del equipu.

   Van Poder optar a estes subvenciones persones físiques o xurídiques domiciliaes n'Asturies qu'acrediten una dedicación profesional a la producción teatral. Les ayudes van poder cubrir hasta'l 80 % del presupuestu total del proyectu.

   La convocatoria va publicase llueu nel Boletín Oficial del Principáu (Bopa) y na Base de Datos Nacional de Subvenciones, onde se van detallar los plazos, cuantíes y formularios de solicitú.