Les protestes contra Israel dexen yá más d'una ventena de deteníos na Vuelta Ciclista a España

   MADRID, 12 Sep. (EUROPA PRESS) -

   Les repitíes protestes de sofitu a Palestina y contra la participación del equipu Israel-Premier Tech na Vuelta Ciclista a España dexaron yá más d'una ventena de deteníos acusaos de delitos rellacionaos con desordes públicos nes distintes etapes de la competición.

   Los últimos arrestos produciéronse esti xueves na contrarreló individual en Valladolid. Axentes de la Policía Nacional y Municipal detuvieron a dos activistes con simboloxía de Palestina que saltaren les valles para intentar torgar el pasu d'un corredor del equipu Israel-Premier Tech.

DOLCE DETENÍOS NA XUBIDA AL ANGLIRU

   El pasu de la Vuelta foi dexando detenciones en delles etapes. Con anterioridá a la de Valladolid, fueron arrestaos diez manifestantes propalestinos nel tramu final de la 15ª etapa de La Vuelta, el domingu 8 de setiembre, nos conceyos lucenses d'O Corgo y Monforte de Lemos.

   La etapa con final nel Altu El Angliru, n'Asturies, concluyó con dolce deteníos pola Guardia Civil por distintos fregaos protagonizaos por activistes propalestinos.

   El 3 de setiembre la dirección de la carrera viose obligada a dexar ensin ganador la etapa, con salida y llegada en Bilbao, por cuenta de les repitíes protestes contra Israel pola guerra de Gaza. De resultes de los incidentes, la Erzaintza identificó a cinco persones y otres tres fueron deteníes, ente que cuatro ertzainas sufrieron mancadures.

   Otru fregáu más se rexistró na xubida al Viveru, na qu'un grupu de persones esplegó una pancarta "poniendo en riesgu la seguridá de los ciclistes que diben en cabeza del pelotón" y otru más, al primer pasu del pelotón pela Gran Vía de Bilbao, cuando delles persones "españaron les valles de protección y aprucieron no que tenía que ser el camín de la carrera".