Les xuntes vecinales de Babia (Lleón) piden que'l so Gobiernu autonómicu intervenga nel conflictu territorial con Mieres

LLEÓN, 27 d'Avientu (EUROPA PRESS)

Les xuntes vecinales de la comarca lleonesa de Babia solicitaron esti martes a la Xunta de Castiella y Lleón qu'intervenga nel conflictu territorial existente nel Puertu de Pinos, y anunciaron que van elevar esta problemática a la vicepresidenta del Gobiernu, Soraya Sáenz de Santamaría.

Les xuntes vecinales de Candemuela, Pinos, San Emiliano y Villargusán consideren que se trata d'un "conflictu históricu" y la so intención ye tornar la comarca nun "motor de desarrollu".

Según esplicó l'abogáu de les xuntes vecinales, Carlos González Antón, esta problemática tien un carácter territorial, dao que'l Conceyu de Mieres (Asturies) xestiona y promociona, como titular del monte y renteru, competencies públiques nel territoriu lleonés, algo "illegal".

L'orixe del conflictu vien del añu 1926, momentu en que'l Conceyu de Mieres mercó cinco montes del puertu de Pinos a la Fundación Sierra Pambley, momentu dende'l qu'exercen les mentaes potestaes públiques na zona, pese a que la lexislación prohíbelo.

La pasada selmana'l plenu del Conceyu de Mieres acordó solicitar al Gobiernu d'Asturies que reclame ante les Cortes la incorporación como territoriu asturianu de les 900 hectárees de monte que'l conceyu tien en propiedá dende hai 85 años en Babia. Pela so parte, el plenu del Conceyu de San Emiliano respondió con una moción na que muestra'l so refugu al pidimientu de Mieres.

QUE MIERES SE RETIRE "ORDENADAMENTE"

Pa les xuntes vecinales lleoneses trátase de 900 hectárees d'un eleváu valor natural, polo que la so esixencia pasa per que'l Conceyu de Mieres se retire "ordenadamente" d'esti conflictu.

Pa González Antón, "esti ataque" tien un "claru interés autonómicu", dao que se pretende la incorporación a Asturies d'una zona de Castiella y Lleón, y la solución ye que se devuelva la titularidá de los montes. Amás, les xuntes vecinales lleoneses reclamen que Mieres dexe d'arrendar con dineru público los montes de Babia, algo de lo que tamién responsabilizaron a la Conseyería d'Agricultura y Ganadería de la Xunta de Castiella y Lleón.

Ante esta situación, les xuntes vecinales van enviar una carta a Soraya Sáenz de Santamaría na que van esponer que van llevase a cabu "les acciones correspondientes" nel casu de que'l Gobiernu d'Asturies pretenda eleve a les Cortes el cambiu de les actuales fronteres.

PROYECTU REXONAL

Les xuntes vecinales de Babia consideren que ye necesario que se reconoza l'ámbitu rexonal del proyectu del Puertu de Pinos, algo que tien que promover, al so xuiciu, la Conseyería de Fomentu y Mediu Ambiente cola ellaboración y financiación d'una propuesta asemeyada al d'otres zones del monte como San Glorio.

Ello incluyiría la construcción de la carretera de Pinos nel límite de l'autonomía. Amás, les xuntes vecinales van promover la declaración de Monte d'Utilidá Pública y van reclamar que s'acondicionen les instalaciones pal desarrollu económicu de la zona.

No que se refier a la ganadería estensiva, les sos demandes céntrense en que s'ufierte seguridá no referente a la disponibilidá de les camperes per parte de les poblaciones con "derechos históricos" nel Puertu de Pinos; l'apoyu al caballu hispano-bretón; el fomentu de la treshumancia, según les técniques de llenda y la meyora de les races mastín de Babia y carea lleonés.