La llocura multiversal de 'Everything Everywhere All at Once' trunfa nos Oscar

MADRID, 13 Mar. (EUROPA PRESS) -

'Everything Everywhere All at Once', la llocura multiversal de Daniel Kwan y Daniel Scheinert, ye la gran trunfadora na 95. edición de los Premios Oscar al facese con siete de los once premios a los que taba nomada, ente ellos el de meyor película y meyor dirección.

Foi nuna gala na que Brendan Fraser ('The whale') llevó'l premiu al meyor actor y na que dalgunes de les grandes favorites como 'The Banshees of Inisherin' (9 nominaciones), 'Elvis' (8 nominaciones) o 'The Fabelman' (7 nominaciones) de Steven Spielberg foron les grandes derrotaes y marcharon de vacíu.

"Dicen qu'estes coses namás puen pasen nes películes y nun puedo creer que me tea pasándome a min. Este ye'l verdaderu suañu americanu (...) y a tolos que tais ehí: ¡Siguíi suañando!", proclamó Ke Huy Quan que ganó'l Oscar al meyor actor de repartu y llevantó la primera de les siete estauínes que coronaríen a 'Everything Everywhere All at Once' como ganadora de la nueche.

Un discursu nel que, al igual que la so compañera Jamie Lee Curtis, premiada como meyor actriz de repartu, dedicó'l premiu a la so familia. "Pá, ma... acabo de ganar un Oscar", afirmó emocionada Curtis depués de recordar que los sos padres, Janet Leigh y Tony Curtis, tuvieron nomaos tamién al gallardón y nun lu llograron.

Tamién recordó a la so madre, y a toles madres del mundu a les que definió como "auténtiques superheroínes", Michelle Yeoh, que llevó l'Oscar a la meyor actriz protagonista y convirtióse asina na primer intérprete asiática en consiguir el galardón.

"Esti premiu va pa tolos neños y neñes que se paecen a min y que tán viendo agora la televisión. Esta ye la prueba de que se pue suañar a lo grande y de que los suaños puen ser realidá. Y, rapacines, nun dexéis nunca que naide vos diga que se vos pasó l'arroz", esclamó la protagonista de 'Everything Everywhere All at Once' que, amás de los trés premios interpretativos, llevó los Oscar a meyor guión orixinal, meyor montaxe, meyor dirección y meyor película.

La otra trunfadora de la gala conducida por Jimmy Kimmell foi 'Ensin novedá nel frente', la película alemana d'Edward Berger que yera una de les favorites con nueve candidatures y finalmente llevó cuatro premios: meyor fotografia (James Friend), meyor diseñu de producción (Christian M. Goldbeck y Ernestine Hipper), meyor banda sonora (Volker Bertelmann) y meyor película internacional.

Un gallardón, esti últimu, nel que s'impunxo a 'Close' (Bélxica) de Lukas Dhont, 'The Quiet Girl' (Irlanda) 'EO' (Polonia) de Jerzy Skolimowski y 'Argentina 1985', cinta de Santiago Mitre protagonizada por Ricardo Darín como Julio Strassera, el fiscal del xuiciu contra los responsables de la dictadura militar arxentina.