'Masterchef Celebrity' fala n'asturianu

UVIÉU, 1 Nov. (EUROPA PRESS) -

"Bienveníu a tol mundu y gracies por tar equí" foi la frase qu'utilizó esti martes la presentadora de 'Masterchef Celebrity', Eva González, pa saludar a los comensales que diben saborguiar el menú que-y prepararen los concursantes del programa de TVE. Una frase que fixo que, pela primer vez en 61 años, la televisión pública española tratara al asturianu como a una llingua más d'ente les que se falen nel Estáu.

El Centru Niemeyer d'Avilés foi martes 31 l'escenariu del programa de La 1 'MasterChef Celebrity', onde los concursantes prepararon un menú con un tastu mui astur y que tuvo compuestu por bollu preñáu, fabada asturiana, cachopu y casadielles pa 70 comensales. Amás de pola manera peculiar de preparar los platos -especialmente comentáu en redes sociales foi que tuvieren que preparar en 90 minutos una fabada-, los espectadores fixéronse ecu de que'l programa usara la llingua asturiana.

Un 'Bienveníu a tol mundu y gracies por tar equí' y un 'Vaya fartura' -subtituláu al castellanu por un curiosu 'vaya panzada de comer'- foron les frases qu'usó la presentadora andaluza Eva González. Asina, l'espaciu 'Masterchef Clebrity' dió-y el mesmu tratamientu al asturianu qu'al gallegu, vascu o catalán. Y ye que cuando'l programa graba nes autonomíes onde se falen estes llingües, la presentadora suel dar un saludu na llingua propia de la comunidá, lo mesmo que fixo ayeri Eva González. Nesti casu, n'asturianu.

Una actitú que xeneró multitú de comentarios positivos nes redes sociales al tratase d'un usu que, anque nun llegó acullá d'eses dos frases, garra especial simbolismu al tratase de TVE, la televisión pública española.