Microsoft diz qu'agora correspuende a los reguladores decidir sobre la compra d'Activision

MADRID, 28 Ago. (EUROPA PRESS) -

El presidente de Microsoft, Brad Smith, considera que la compañía de Redmond trabayó "bien duro" p'abordar les esmoliciones plantegaes por dalgunos de los sos rivales respecto de l'alquisición d'Activision Blizzard y agora correspuende a los reguladores, especialmente en Reinu Xuníu, determinar si'l camín ta llibre.

"Trabayamos duro p'abordar les esmoliciones que dalgunos de los nuesos competidores plantegaron, pero creo qu'hai un camín. Va corresponder a los reguladores, especialmente agora nel Reinu Xuníu, decidir si esi camín ta llibre", indicó Smith nuna entrevista cola cadena CNBC.

La selmana pasada, Microsoft y Activision plantegaron un nuevu alcuerdu de fusión pa l'aprobación de l'Autoridá de los Mercaos y la Competencia de Reinu Xuníu (CMA, poles sos sigles n'inglés), dempués de que'l regulador británicu determinara que'l pactu orixinal, valoráu nunos 69.000 millones de dólares (69.354 millones d'euros), sedría bloquiáu pa protexer la innovación y les opciones nos xuegos na nube.

D'esta miente, el nuevu alcuerdu reestructuráu plantegáu poles empreses va ser sometíu pol regulador del Reinu Uníu a una nueva investigación, que se va llevar a cabu acordies colos procesos habituales y que la so fecha llímite llegal pa tomar una decisión va ser el 18 d'ochobre de 2023.

"Como dixo la CMA del Reinu Xuníu, nun hai lluz verde, pero van revisar la nuesa propuesta. Y tengo la esperanza de qu'a mediaos d'ochobre podamos facelo", apunta'l presidente de Microsoft, pa quien agora "hai que dexar que los reguladores falen por sí mesmos".

"Dende'l mio puntu de vista, lo que realmente intentemos fae ye tomar en serio estes esmoliciones. Nun intentemos refugales. Nun intentemos resta-yos importancia. Trabayemos p'aboradales y, al abordales, ellaboremos una transacción que va promover la competencia y coles mesmes va desaniciar les esmoliciones que delles persones teníen", defendió.

Según l'alcuerdu reestructuráu propuestu la selmana pasada, Microsoft yá nun va alquirir los derechos na nube pa los xuegos esistentes d'Activision pa PC y consola, nin pa los nuevos xuegos llanzaos por Activision mientres los próximos 15 años (esto esclúi l'Espaciu Económicu Européu).

Sicasí, estos derechos van vendese a la compañía francesa Ubisoft Entertainment antes de l'alquisición d'Activision per parte de Microsoft.

D'esta miente, Ubisoft va poder llicenciar el conteníu d'Activision baxo distintos modelos comerciales, incluyíos los servicios de suscripción, amás d'apurrir a la francesa la capacidá d'esixir a Microsoft qu'ufierte versiones de xuegos en sistemes operativos distintos de Windows.

El pasáu 19 de xunetu, Microsoft y Activision Blizzard alcordaron estender hasta'l próximu 18 d'ochobre la fecha llímite pal zarru de la compra per parte del xigante de Redmond del estudiu responsable de videoxuegos como la saga 'Call of Duty'.

La transacción, apautada nunos 69.000 millones de dólares en xineru de 2022, tenía afitada primeramente como fecha llímite pal so zarru'l 18 de xunetu de 2023.