El Ministeriu de Cultura va invertir 1,1 millones en siguir recuperando'l Pozu Santa Bárbara, en Mieres

UVIÉU 21 Feb. (EUROPA PRESS) -

El ministru de Cultura, Ernest Urtasun, anunció esti miércoles una partida de 1,1 millones d'euros pa emplear, en 2024 y 2025, na recuperación del Pozu Santa Bárbara, infraestructura minera de Turón, nel conceyu asturianu de Mieres, declarada Bien d'Interés Cultural.

Trátase de la primera gran esplotación na cuenca del Caudal y ún de los mayores pozos mineros d'Asturies. Empezó a funcionar na segunda década del sieglu XX pola empresa vasca Hulleras del Turón y tuvo en funcionamientu hasta 1995. Foi declaráu Bien d'Interés Cultural en 2010 cola categoría de Conxuntu Históricu.

Depués de le meyores realizaes hasta la fecha, la instalación convirtióse nun centru de referencia d'intervenciones artístiques contemporanees (PZSB), tresformando asina la sala de compresores n'escenariu d'esperiencies artístiques y culturales.

Urtasun visitó'l Pozu Santa Bárbara aprovechando la so presencia n'Asturies, onde esti xueves 22 de febreru preside nel Centru Niemeyer, n'Avilés, la xunta del Plenu de la Conferencia Sectorial de Cultura.

En declaraciones a los periodistes depués de tar na antigua instalación minera, Urtasun mostró'l so apoyu al proyectu y comentó que'l Ministeriu ta "comprometíu dafechu" cola instalación.

Los 1,1 millones mentaos van valir pa siguir coles actuaciones que l'Institutu de Patrimoniu Cultural tien que realizar na zona.

La inversión ye necesaria, según el Ministru, pola defensa y la recuperación de la memoria de la clase trabayadora, de les vides de la minería, de lo qu'equí significó, y tamién "pol apueste pol futuru económicu del país". Nesti sentíu, señaló que les zones mineres "tienen futuru económicu" a partir de la recuperación d'espacios como'l de Santa Bárbara, qu'han de ser "auténticos vectores de dinamización económica d'esta zona".

Nes sos declaraciones, Urtasun quixo rindir homenaxe públicamente a Anibal Vázquez, alcalde de Mieres que finó'l mes de payares.

El Ministru tamién s'interesó pol proyectu 'Caja de Resistencia' que punxo en marcha'l Conceyu de Mieres contra la censura na cultura.

"Mieres convirtióse nun conceyu de referencia no que ye la cultura nel nuestru país por tolo que se ta faciendo, por exemplu, contra la censura, al traviés d'esa caxa de resistencia que se punxo en marcha y que ye una esperiencia bien importante de defensa de la llibertá d'espresión", valoró.

'Caja de Resistencia' ye una iniciativa que simboliza "un actu de solidaridá ente persones con conciencia basada nel apoyu mutuu, como fixeron tiempos atrás los mineros o los trabayadores d'otros sectores pa poder encarar les movilizaciones y les fuelgues mientres delles selmanes o meses, hasta consiguir les sos reivindicaciones y conquistar derechos o llibertaes nueves", según información del Conceyu de Mieres.