Morrió María Trabáu, ún de los mayores referentes de la música tradicional asturiana

María Trabáu.
TPA.
Actualizado: lunes, 27 enero 2020 19:04

UVIÉU, 27 Ene. (EUROPA PRESS) -

La panderetera María Trabáu morrió esti llunes a los 87 años depués de sufrir un procesu d'enfermedá nel últimu mes. María González, conocida nel ámbitu de la música tradicional como 'María Trabáu' pol so llugar d'orixe en Degaña, yera ún de los grandes referentes de la música tradicional asturiana.

Según pudo confirmar a Europa Press l'etnógrafu Xosé Antón Ámbas, María Trabáu finó esti llunes nuna residencia en Ponferrada (Llión), onde taba en procesu de rehabilitación d'una enfermedá

La panderetera yera'l gran referente de la cultura tradicional del Suroccidente asturianu y, en concreto, de la zona de los 'cunqueiros'. Amás, como conservadora de la variante cunqueira de la llingua asturiana, foi fonte pa munchos investigadores de la cultura tradicional. La mesma Universidá d'Uviéu vien dedicando dende hai cuatro años una salida de campu de los estudiantes de musicoloxía a conocer el repertoriu de María Trabáu.

Otra manera, el procesu de recuperación que vive la pandereta asturiana bebe de les sos fontes. Protagonista de dellos capítulos de la serie documental de TPA, 'Camín de Cantares', foi la tresmisora de munchos temes que güei suenen nes 'Nueches en Danza' o nos discos de los grupos asturianos de folk. María Trabáu llegó a publicar xunto a la so hermana Arcides un discu qu'editó'l Muséu del Pueblu d'Asturies.

La Xunta pola Defensa de la Llingua Asturiana recordó nes sos redes sociales que María Trabáu participó nel videoclip del 'Cantar del Vasu', dedicáu a reivindicar la tresmisión de la llingua asturiana a les xeneraciones nueves. "Ye y va ser un referente imprescindible na cultura asturiana. La so voz va siguir resonando", afirmaron nun apunte en Facebook recoyíu por Europa Press.

Asturianu ofrecido por