UVIÉU, 6 Ago. (EUROPA PRESS) -
La conceyala y portavoz de Podemos-Equo Xixón, Yolanda Huergo, morrió esti xueves a los 49 años d'edá depués d'una llarga enfermedá. Militaba dende hai décades en dellos movimientos sociales, como'l de defensa de la oficialidá de la llingua asturiana.
Podemos Asturies llamentó'l fallecimientu y indicó nes sos redes sociales que "foi un arguyu compartir llucha con ella". "El so exemplu, compromisu y dedicación siempre va ser inspirador", señalaron.
Yolanda González Huergo, nació en Xixón en 1971 y yera funcionaria nel área d'Urbanismu de Siero dende l'añu 2004. Enantes d'entrar como conceyal de Podemos-Equo nel Conceyu de Xixón, participó en dellos movimientos sociales de defensa de los derechos humanos.
Amás, militó en formaciones asturianistes como la coalición Bloque por Asturies-Unidá Nacionalista Asturiana, de la que foi númberu dos pola circunscripción central nes autonómiques del 2011.
La conceyala yera una de les cares visibles del ala más asturianista de Podemos y en 2018 foi escoyida candidata de la formación nel Conceyu de Xixón. Militaba dende facía décades na Xunta pola Defensa de la Llingua Asturiana y la llucha pola oficialidá yera ún de los sos principales compromisos sociales.
