El movimientu feminista asturianu va percorrer les cais de Llangréu'l 8M col lema 'A golpe de tacón, dando tira'

MOVIMIENTO FEMINISTA

UVIÉU 1 Mar. (EUROPA PRESS) -

El movimientu feminista asturianu va percorrer el 8 de marcu les cais de Llangréu col lema 'A golpe de tacón, dando tira', lema escoyíu pa "homenaxar a les muyeres valientes que protagonizaron una parte clave de la fuelgona del 62 y enseñaron a les muyeres a defender derechos".

Según esplicó una de les portavoces del movimientu, Carla Izaguirre, la manifestación unitaria de Llangréu va salir del Parque Antonio García Lago (Parque Nuevu de La Felguera) a les 19:00 hores y va acabar nel Parque Doráu (Sama).

"Xusto unos meses depués del fallecimientu de Anita Sirgo y Maruja Ramos, recordamos los tacones colos que Anita cutía la paré de la celda pa comunicase col so home en metá dde les tortures y la escuridá. Al llombu del so exemplu lleguemos hasta equí. A golpe de los tacones de Anita, Tina, Maruja y tantes otres muyeres trabayadores anónimes, poques veces reconocíes y munches invisibilizaes", indiquen los organizadores.

En cuanto al llugar escoyíu, Llangréu, destaquen que se trata de siguir una estratexa de descentralizar les manifestaciones, "esto ye, llograr sacar la movilización de les ciudaes principales", inciden.

El movimientu "Asturies Feminista 8M" lleva selmanes preparando acciones previes per toa Asturies. La so actividá entama n'asamblees abiertes, grupos de trabayu territoriales, grupos de conteníu pal desarrollu de propuestes polítiques en materia de violencies machistes, derechos llaborales, educación n'igualdá, salú feminista, diversidá funcional con perspectiva de xéneru y pensiones dignes pa les muyeres.

Esti 8M caltién los oxetivos qu'impulsaron esti movimientu dende les fuelgues feministes de 2018 y 2019, col espíritu tresformador y la vocación unitaria de siguir construyendo feminismu per tol territoriu asturianu, incorporando a más muyeres y visibilizando les sos reivindicaciones polítiques.