Muerre Davy Jones, cantante de The Monkees

GETTY

LONDRES, 1 de Marzu (EUROPA PRESS)

El miércoles morrió en Florida la voz y, según munchos, la cara de The Monkees, la banda estaounidense que saltó de la pequeña pantalla a les llistes d'éxistos con cantares como 'I'm a Believer', 'Last Train to Clarksville' o 'Daydream Believer' a últimos de los 60.

Davy Jones, nacíu en Manchester, morrió'l pasáu miércoles nel Martin Memorial Hospital de Stuart, Florida, a los 66 años d'edá, en sufriendo un ataque al corazón. En conociéndose la noticia, estrelles como Will Smith, Eva Longoria o Neil Diamond -quien escribió pa The Monkees 'I'm a Believer'- espresaron el so pesar en Twitter y Facebook.

Jones empezara la so carrera como actor a los once años na serie británica 'Coronation Street'. La so participación nel musical 'Oliver!' llevaríalu a Broadway, onde llograría una nominación a un Tony y entraría en contactu cola compañía Screen Gems, qu'en 1966 crearía la serie de televisión 'The Monkees'.

"Yo yera un actor que podía cantar, igual que Micky Dolenz", esplicó nel so día Jones sobre'l casting al que se presentó nel que se buscaben 'Cantantes y músicos de Folk & Roll pa papeles nuna serie de televisión'. "Mike Nesmith y Peter Tork yeren músicos. Había una mecigaya d'intereses", señalaba.

Ente 1966 y 1968 la serie 'The Monkees' llogró un gran éxitu en televisión, incluyendo dos premios Emmy, pero'l verdaderu éxitu túvolu nes llistes de ventes de música. Los cuatro primeros discos algamaron el númberu ún nes llistes estaounidenses, llogrando toos ellos la certificación de multiplatinu.

Tres la cancelación de la serie y una batalla llegal por llograr el control de la música que facíen, The Monkees siguieron colos discos y les xires, y hasta participaron nuna película, 'Head', de 1968. Sicasí, col pasu de los años solu Micky Dolenz y Davy Jones quedaron al frente del proyectu, qu'acabó en 1970.

Mientres años, Jones y Dolenz siguieron dedicándose a la música con Tommy Boyce y Bobby Hart, hasta qu'a mediaos de los 80 la MTV resucitó la serie y Nesmith y Tork reunióse colos sos antiguos compañeros pa una xira qu'a lo último traduciríase na grabación de dos nuevos discos.

Consideraos nel so día como una imitación-parodia de los Beatles, lo cierto ye que la última vez que pudo vese a The Monkees sobre un escenariu foi l'añu pasáu, cuando realizaron una xira pol 45 aniversariu de la banda. Según Dolenz, daquella Davy siguía en plena forma: "Les muyeres tovía se volvíen lloques con él".