Nadal señala la importancia de caltener les centrales nucleares pa que pervivan les de carbón

UVIÉU, 20 Nov. (EUROPA PRESS) -

El ministru d'Enerxía, Turismu y Axenda Dixital, Álvaro Nadal, refirióse esti llunes n'Uviéu a la política enerxética nacional. Nuna rueda de prensa xunto al presidente del Principáu, Javier Fernández, Nadal refirióse a la importancia de caltener centrales nucleares en funcionamientu si quier caltenese les qu'usen el carbón.

Depués de la firma d'un conveniu na sede de Presidencia del Principáu, y a entrugues de los periodistes sobre los planes pa les centrales nucleares, Nadal refirióse a los oxetivos medioambientales y dixo que les últimes resultaos señalen qu'España "va abondo bien".

"Si caltenemos nel mix la enerxía nuclear, vamos poder tener más carbón", afirmó'l ministru. Sicasí, terminar con dambos tipos d'enerxía na producción n'España, la nuclear y la térmica, daqué que piden delles fuercies polítiques, namás va significar que xuba'l preciu de la eletricidá, daqué que, amás, va tener consecuencies negatives pa les compañíes que son grandes consumidores.

"Vamos introducir enerxíes renobables y ameyorar la eficiencia enerxética; tenemos que facer compatible'l sistema coles obligaciones d'emisiones de CO2. La enerxía nuclear nun emite CO2, polo que tienes muncho más marxe pa les térmiques", señaló.

Nadal esplicó que'l debate políticu sobre'l modelu enerxéticu nun ye menor y refirióse a la situación n'Alemaña, onde nun se punxeron d'alcuerdu en cuestiones como'l mix enerxéticu y rompióse la coalición de gobiernu.

El ministru d'Enerxía quixo tamién pidir públicamente a la Comisión Europea unos "criterios claros" a la hora d'alcordar un sistema p'afitar precios pa industries electrointensives.

IBERDROLA

El ministru tamién foi preguntáu na rueda de prensa pola decisión d'Iberdrola de cerrar la central térmica de Lada, nel conceyu asturianu de Llangréu. Teniendo en cuenta qu'esti tipu de decisiones, con zarros de plantes, pue influir nel míx nacional y nos precios, Nadal defendió la necesidá d'adoptar decisiones polítiques a esti respectu.

Asina, esplicó que'l Gobiernu d'España trabaya na ellaboración d'un Real Decretu qu'obligue a toa aquella empresa del sector enerxéticu que quiera cerrar una planta, sía térmica o non, a probar que la mesma nun ye viable económicamente. "Pue que-y interése cerrar por una decisión estratéxica por que xuba el preciu...", señaló, enantes de dicir que la meyor forma de probar que la empresa ye rentable ye qu'haya compradores convencíos.