Navia, Ayande, Cuideiru y Ibias son los únicos conceyos pendientes d'oficializar la so toponimia

Archivo - Información de las próximas salidas en la estación de La Corredoria con la toponimia en asturiano.
EUROPA PRESS. - Archivo
Publicado: viernes, 27 mayo 2022 13:43

UVIÉU, 27 May. (EUROPA PRESS) -

El Conseyu de Gobiernu aprobó esti vienres la toponimia oficial de Somiedu, polo yá son 74 de 78 los conceyos colos sos nomes tradicionales oficializaos. Asina, namás Navia, Ayande, Cuideiru y Ibias tán pendientes d'acabar esti procesu.

Los trés primeros tán gobernaos pol PSOE, mentes qu'Ibias tien una alcaldesa 'popular'. A lo llargo d'esti mandatu, l'Executivu autonómicu dio lluz verde a la toponimia de 8 de los 12 conceyos pendientes d'oficializar, concretamente la de Cabrales, Castropol, El Valle Baju Peñamellera, Llanera, Pravia, Salas, Caravia y Somiedu.

Nel casu de Somiedu, el decretu recueye, previu dictame de la Xunta Asesora de Toponimia, los nomes oficiales de les parroquies rurales y poblaciones del conceyu, d'alcuerdu cola so denominación tradicional en llingua asturiana. La denominación oficial de la capital del conceyu va ser La Pola Somiedo, optando asina por una única forma de consensu.

Depués de la publicación de la norma nel Bopa, les alministraciones públiques van adaptar de manera progresiva les rotulaciones en víes públiques y carreteres, amás d'en mapes y planos oficiales, a les formes toponímiques aprobaes.

Nestos momentos son 74 los conceyos que tienen les sos denominaciones tradicionales regularizaes oficialmente. A lo llargo d'esta llexislatura, impulsóse'l procesu d'oficialización de los topónimos pendientes, en collaboración colos conceyos. Asina, dende'l branu de 2019 diose lluz verde a la toponimia de Cabrales, Castropol, El Valle Baju de Peñamellera, Llanera, Pravia, Salas, Caravia y Somiedu.

Asturianu ofrecido por