Noyos revoluciona l’aprendizaxe d'adultos n'asturianu con materiales multimedia y una plataforma dixital

   UVIÉU, 26 May. (EUROPA PRESS) -

   L'Academia de la Llingua Asturiana presentó esti llunes na so sede d'Uviéu el primer nivel del proyeutu formativu d'asturianu p'adultos 'Noyos'. Según esplicó'l so presidente, Xosé Antón González, trátase d'una iniciava "fundamental", non solo dende'l puntu de vista didácticu, sinón tamién pola so relevancia na promoción del usu consciente de la llingua y na construcción de la identidá cultural.

   Noyos ta diseñáu específicamente p'adultos y sigue'l Marcu Común Européu de referencia pa les llingües, estructurándose en seis niveles: A1, A2, B1, B2, C1 y C2. Según González, "ye la primer vegada qu'un métodu d'aprendizaxe d'asturianu s'afaya al Marcu Común Europeu". Yá ta disponnible'l nivel A1, que puede mercase en llibreries y a lo llargo d'esti añu saldrá tamién l'A2.

   L'oxetivu de l'Academia ye completar tolos niveles en dos años, facilitando asina una formación completa pa los neofalantes y adultos que quieran deprender asturianu.

UNA FERRAMIENTA "VERSÁTIL" P'APRENDER ASTURIANU

   El nuevu métodu supón "un saltu" respecto a esperiencies anteriores y marca un antes y un dempués nos materiales pa la formación d'adultos, tal y como señaló ún de los miembros de la comisión que desenvolvió'l proyeutu y trabayador de la Secretaría Téunica de l'Academia de la Llingua Asturiana, Carlos Suari.

   Pa él, la situación actual, col marcu européu de referencia y una sociedá cada vez más dixitalizada, esixía apostar por un enfoque comunicativu y materiales multimedia, adaptativos y versátiles, capaces de responder a perfíles y disponibilidaes mui diverses.

   "Como llingua pequeña, llegamos con retrasu a estos elementos en comparación con otres llingües, pero por fin llegó'l momentu", afirmó Suari, quien recordó que l'Academia llevaba décades impulsando cursos p'adultos con niveles mui diversos de conocencia del idioma.

   "Vivimos nun mundu onde toos queremos facer coses pero nun siempres tenemos tiempu. La ferramienta tenía que ser versátil, válida pa contextos formales y pa l'autoformación", esplicó Suari, que destacó tamién el trabayu de nivelación del idioma y l'esfuerciu por afitar los conteníos a los niveles del marcu européu, un retu especialmente complexu pa una llingua como l'asturianu, que nun cuenta cola mesma industria de formación que otres llingües.

LA PARTE "MÁS PRESTOSA": L'AUDIOVISUAL

   Aida Celemín, trabayadora tamién de la Secretaría Téunica de l'Academia de la Llingua Asturiana y miembru de la comisión que desenvolvió'l proyeutu, cerró la presentación del nuevu métodu Noyos destacando la importancia de la parte audiovisual y la versatilidá de la ferramienta.

   "La parte más prestosa ye'l tema audiovisual", ya que tien vídeos y personaxes que faciliten l'aprendizaxe y lu faen más entreteníu, esplicó mientres se proyectaba'l primer vídeo del cursu.

   Celemín recordó que'l métodu ta pensáu pa 45 hores d'estudiu y que se complementa con materiales escritos, exercicios y una plataforma dixital que permite l'autoaprendizaxe y l'autoevaluación.

   Los llibros yá tán disponibles en llibreríes d'Asturies y na propia Academia, y puen usase tanto en cursos presenciales como de manera autónoma. Si tienes un profesor, el procesu ye más completu, pero quien quiera aprender pela so cuenta, con estos materiales y la plataforma, puede facelo "ensin problema", aseguró Celemín.

L'Academia de la Llingua Asturiana pon esti métodu d'enseñanza a disposición de cualquier asociación o grupu que quiera usalu como ferramienta pa ufiertar clases d'asturianu.