Nuberu, Los Berrones, Dixebra y Llan de Cubel, ente otros, van actuar nel Conciertu pola Oficialidá, los díes 25 y 26

UVIÉU, 08 d'Abril (EUROPA PRESS)

El Conciertu pola oficialidá, previstu pa los próximos díes 25 y 26 d'abril, presenta nesta la so vixésima edición, el cartel de mayor entidá, con dalgunos de los grupos más renomaos del panorama musical asturianu, como son el duu Nuberu, Dixebra, Los Berrones, Llan de Cubel o Tejedor.

L'actu foi presentáu güei pola xunta pola Defensa de la Llingua Asturiana nuna rueda prensa na que tuvieron presentes Xune Elipe, vocalista de Dixebra, el gaiteru José Manuel Tejedor, el tamién gaiteru Santi Caleya, de La Bandina, y tori, vocalista del grupu de 'hip-hop' K-Nalón.

Xune Elipe, entamador del primer conciertu hai 20 años n'Avilés, fizo de voceru de toos ellos, mostrando la so satisfaición por que los organizadores contaren con Dixebra, y el so pesar porque "20 años dempués desgraciadamente tengamos que siguir organizando'l mesmu conciertu pola mesma razón". "Dende qu'hai 20 años organizamos el primer Conciertu Pola Oficialidá n'Avilés, con Balandrán, Dixebra y Llan de Cubel, casi tolos grupos asturianos actuaron na cita", lo qu'a xuiciu del cantante "ye una muestra del compromisu de los músicos asturianos cola oficialidá de la llingua".

Esta vixésima edición va ser la primera que se divida en dos díes y va celebrase nel recintu de la Feria de Muestres de Xixón. El vienres 25 van actuar Nuberu, Llan de Cubel, Skanda, K-Nalón, Xera, Skama la Rede y Gomeru. Al día siguiente va ser el turnu pa DRD, La Col.la Propinde, Tejedor, Los Berrones, La Bandina, Dixebra y Chalaneru Sound. El preciu de la entrada pa caún de los dos díes va ser d'ocho euros anticipada y diez nel llugar del conciertu, mientres que'l bonu de dambes xornaes va ser de 14 euros anticipáu y 16 nel llugar.

El restu de los músicos ellí axuntaos agradecieron a la Xunta la invitación a participar, y mostraron el so deséu de qu'ésti seya l'últimu conciertu pola oficialidá "y que del añu que vien seya'l primeru con oficalidá", afirmó Santi Caleya, quien mostróse pesimista sobre la posibilidá d'algamar esti oxetivu. Tejedor recordó que'l so grupu ta acabante de recoyer un premiu en Valladolid, "onde se reconoz la llingua, asina qu'a ver si la reconocen equí". "Por último, Tori mostró'l so deséu de que "se cumpla l'artículu de la Constitución española que diz que les llingues del estáu van ser oficiales nes sos respectives comunidaes autónomes".

Los representantes de la Xunta convidaron a tola sociedá a dir a al conciertu y calcularon una alta participación de públicu, basándose en que n'otres ediciones llegáron a vendese más de 3.000 entraes, siendo un cartel de menor entidá, demientres sólo un día, y teniendo en cuenta que "esti añu la llingua asturiana ye protagonista de la política, por ser l'añu de la reforma del estatutu".