El PAR pide reconocer l'aragonés oriental y suprimir el catalán na Llei de Llingües

ZARAGOZA, 16 de Febreru (EUROPA PRESS)

Les Asamblees y Comités Llocales del Partíu Aragonés (PAR) de la zona oriental d'Aragón reclamaron que se reconoza l'aragonés oriental y se suprima'l catalán na Llei de Llingües d'Aragón.

Estes asamblees y comités del PAR axunten a los conceyos d'Altorricón, Benabarre, Peralta de Calasanz, Fraga, Velilla de Cinca, La Codoñera, Ráfales, Fórnoles, Beceite, Calaceite y Aguaviva y el Comité Comarcal del PAR de la Comarca del Bajo Aragón que agrupa a los comités y asambleas del PAR de Aguaviva, Alcañiz, Alcorisa, Belmonte de San José, Berge, Calanda, La Cañada de Verich, Castelserás, La Cerollera, La Codoñera, Foz-Calanda, La Ginebrosa, Mas de las Matas, La Mata de los Olmos, Los Olmos, Las Parras de Castellote, Seno, Torrecilla de Alcañiz, Torrevelilla y Valdealgorfa.

Nun comunicáu, estos comités del PAR esixen que na Llei de Llingües se reconoza que n'Aragón se falen dos llingües, español y aragonés, y qu'ésta última tien distintes modalidaes arrexuntaes básicamente en dos: "aragonés oriental, na zona oriental de la Comunidá y altroaragonés, na zona norte".

Coles mesmes, reclamen que s'elimine "cualquier referencia a la llingua catalana" y se sumprima l'Academia Aragonesa de la Llingua Catalana, "y si ye preciso crear una que seya l'Academia de la Llingua Aragonesa o Academia de Cultura Aragonesa".

El secretariu del PAR d'Altorricón, Amado Forrolla, señala que "la unidá del partíu nesti tema ye un fechu y ente toos tenemos de llograr que la Llei de Llingües reconoza la nuesa llingua aragonesa, tanto la so modalidá altoaragonesa como la so modalidá oriental".

Pela so parte, el presidente del Comité Llocal del PAR de Fraga, Ángel Romero, sorraya "la nuesa voluntá por potenciar la nuesa llingua aragonesa y que podamos escribir nella", a lo que Julián Naval añade que "el nuesu idioma ye aragonés polos cuatro costaos y esto ye un fechu qu'avala la historia".

Los mentaos 31 Comités y Asamblees informen que'l procesu de reivindicación sigue abiertu polo qu'otres agrupaciones del PAR van realizalu xuntes pa sumase a estos pidimientos de los aragonesistes.