Piñán destaca l'apueste pola cultura con llinies nueves d'ayudes al sector y a los circuitos

UVIÉU, 15 Dic. (EUROPA PRESS) -

La conseyera de Cultura, Política Llingüística y Turismu, Berta Piñán, y el so equipu presentaron esti miércoles nel Parllamentu les cuentes del so departamentu pa 2022, qu'algamen los 69.715.042 euros, con una xuba de cuasi'l 16,28% en comparanza con anguaño y que va aumentar los recursos pa toles sos competencies. La conseyera insistió na medría pa potenciar el sector cultural y la programación de les sos circuitos per tol territoriu.

Asina, Piñán destacó que se van dedicar 1,8 millones a seis llinies nueves d'ayudes pa les artes escéniques y visuales, la música, la edición, el cine audiovisual y el videoxuegu, dotaes con 700.000 euros, y a programar actividaes per tol territoriu al traviés de los circuitos d'Asturies, Cultura en Rede, pa los que se conseña un millón, al que se suma la partida pa iniciatives impulsaes por asociaciones y entidaes ensin ánimu d'arriquecimientu, que va cuntar con 100.000 euros.

"Pa poner de manifiestu la intensidá del apueste d'esta Conseyería pola Cultura, puedo recordar namás un datu: en 2019 destinóse al únicu circuítu que nesi momentu existía, el d'artes escéniques 188.000 euros, agora Cultura en Rede destina al so circuitu escénicu la cantidá de 400.000 euros nel 2022", dixo Piñán.

TURISMU

En materia de Turismu, Berta Piñán destacó que la so conseyería aumenta un 30% el presupuestu pa financiar los planes ordinarios de sostenibilidá en destín. Asina, en 2022, la viceconseyería va invertir 1.600.000 euros pa la cofinanciación d'estos proyectos, 500.000 más qu'anguaño. Esta cantidá, xunto cola aportación estatal y local, va permitir desenvolver n'Avilés y n'Ayer dos iniciatives que van dar l'impulsu definitivu pal turismu de dambes zones.

Amás, a los cuasi 13.000.000 euros del presupuestu de Turismu pa 2022 van sumase otros 25 millones que se van distribuyir al traviés de distintes llinies primero d'acabar l'añu. Asina, al traviés del Plan Nacional Turísticu Xacobéu, van facer actuaciones vinculaes al Camín de Santiago con una inversión de 11.100.000 euros. D'ellos, 5.300.000 van dir pa la sostenibilidá, dixitalización y accesibilidá de les rutes xacobees asturianes.

"El presupuestu del 2022 ta pensáu pa facer más fuerte y rápida la recuperación del sector turísticu, una recuperación que tamién va ser el primer pasu pa la construcción d'un modelu turísticu asturianu pa los próximos 10 años d'alcuerdu cola Estratexa Turística d'Asturies 2020/2030 y nel que la disponibilidá y execución de los Fondos europeos va ser fundamental", esplicó la conseyera.

Al traviés de la llinia de rehabilitación de patrimoniu históricu na zona d'estos itinerarios, va acometese la última fase de l'ampliación del Muséu de Belles Artes, con una inversión de 5.800.000 euros.

Tamién con cargu a fondos europeos van sumase 7.474.000 euros al presupuestu p'actuaciones de cohesión del plan territorial 2021, y otros 6.600.000 pa tramitar una llinia d'ayudes destinada a financiar proyectos d'eficiencia enerxética n'agospios turísticos.

CULTURA

Al marxe de les llinies pal sector cultural y de la dotación pa los circuitos culturales, les ayudes p'actividaes en museos municipales xuben hasta 75.000 euros y les subvenciones pa renovar la so infraestructura, hasta 50.000.

Los fondos d'apoyu al Muséu de la Sidra pasen de 8.640 a 30.000 euros nel añu en que se va presentar énte la Unesco la candidatura a Patrimonio Mundial Inmaterial de la cultura sidrera. El Muséu de Belles Artes va aumentar la so tresferencia en 85.953 euros, de la que se va crear una partida nueva, dotada con 70.000, p'alquisición d'obra.

Tamién se van dedicar 200.000 euros a un programa cultural pal 1.300 aniversariu de la batalla de Cuadonga, que va incluyir una gran esposición nel Muséu Arqueolóxicu, y la inauguración del Camín de los santuarios, ente Uviéu-Cuadonga y Llébana. Otros 100.000 euros van valir pa dar apoyu al Festival Intercélticu de Lorient, onde Asturies va ser la comunidá convidada d'honor, y 75.000 más pa la presencia asturiana na Feria Internacional del Llibru de Frankfurt, onde España va ser el país invitáu.