AVILÉS, 26 de Mayu (EUROPA PRESS)
La Plataforma escontra la represión y llibertaes pidió güei nuna concentración ante'l Conceyu d'Avilés "solidaridá" con dos trabayadores de les piscines municipales, Manolo Horta y Javier González, a quien s'acusa de repartir unes fueyes que, según el voceru de la plataforma, Marcos García, denunciaben "los planes de privatización y una persecución constante a la plantiya".
Según manifestó'l voceru de la plataforma, el xuiciu que va celebrase'l día 10 nos xulgaos de lo penal d'Avilés representa un "ataque más" a los trabayadores que defienden el so puestu de trabayu y la so dignidá. "Na querella se-yos pide 85.000 euros colos que pretenden facer callar a cualquier trabayador, seya'l que seya cuando defienden el so puestu de trabayu, amás de querer quitar llextimidá a cualquier tipu de movilización o reivindicación", esplicó marcos García.
La Platafomra escontra la represión va facer asina dellos actos reivindicativos. El primeru va entamar el 6 de xunu a les 19.30 hores na plaza España. Nel actu va informase de la situación d'estos dos trabayadores y tamién va haber música y actividaes teatrales. El 10 de xunu, día'l xuiciu, convócase una concentración pa que los trabayadores sepan, según los miembros de la plataforma que "nun tán solos".
"Naide pon en duda la so capacidá de trabayu", dixo García. La querella ye, según espunxo'l voceru de la plataforma, por difamación.
"Se-yos acusa de repartir octavielles, anque a nós mos consta que nin les repartieron nin ellaboraron, amás lo único que traen son fechos ciertos porque se acusa al Conceyu de tentar de privatizar deteriorando'l serviciu públicu y a los xefes de piscines d'acosu de trabayu, y amás hai sentencies que lo demuestren", aseguró Marcos García, representante de la Plataforma poles Llibertaes y Escontra la Represión.
Dende la Plataforma pidieron asina que'l Conceyu d'Avilés defienda'l "bon nome" de los sos trabayadores de les piscines municipales y que se retire la demanda presentada.
Pa Marcos García, ésti ye ún de los numberosos casos de represión sindical, social y política que sufren los ciudadanos asturianos. Como exemplu d'ello punxo al trabayador de Juliana, José Antonio Rodríguez, a quien-y piden cinco años de cárcel, al abogáu Roberto Roces, defensor de los vecinos de San Andrés de los Tacones, o a Txomin, seccretariu d'Avall.
Andalucía
