Podemos Asturies pide a la Xunta Xeneral que nun xuegue cola frustración de les persones asturfalantes pola oficialidá

    OVIEDO, 9 May. (EUROPA PRESS) -

   Con motivu del Día les Lletres Asturianes, el Coordinador Autonómicu de Podemos Asturies, Diego Ruiz de la Peña, espresó'l so deséu de que la representación política na Xunta Xeneral "nun xuegue cola frustración de les persones asturfalantes" que "lleven cinco décades reivindicando un derechu básicu como ye usar la llingua asturiana".

   "Una vuelta más nun hai más opción real que la de siguir con una carencia democrática pa una parte de la sociedá asturiana que lo único que pide ye usar la llingua asturiana ya'l eonaviego cola mesma normalidá que la castellana", esplica.

   Acompañáu pol Secretariu de Política Llingüística y Voceru en Siero, Gustavo Forcelledo, Ruiz de la Peña punxo en valor "la calidá y la cantidá de la producción en llingua asturiana seique tea penriba de lo esperable pal tamañu poblacional y pal contestu social nel qu'esta se desendolca".

   Nesti marcu, señala qu'esti vienres, Día de les Lletres Asturianes, "recuérdase a un autor que yá ye un clásicu, Xosé Álvarez Pin, y l'Academia de la Llingua, la Conseyería y munchos Conceyos van entamar actos culturales n'homenaxe a la llingua propia".

   A pesar dello, Forcello considera "si miramos la situación llegal y sociollinguística d'esa mesma llingua con puxu lliterariu, atopamos les mesmes carencias de siempres". "El Parllamentu Asturianu foi incapaz de dar el tratamientu que merez una seña d'identidá tan importante", señala y llamenta "qu'un elementu que debía ser motivu de xunión y arguyu pa tola xente d'Asturies acabó por convertise'n moneda de xuegu políticu".