La Policía turca entama entrugar a una parte de los más de 40 oficiales deteníos ayeri

REUTERS

ISTAMBUL, 23 de Febreru (Reuters/EP)

La Policía turca entamó esti martes a entrugar a distintos oficiales del Exércitu deteníos ayeri, mientres qu'otru grupu de deteníos testificó ante un tribunal por un presuntu complot pa deponer al Gobiernu, según indicaron los medios turcos.

Ente los 49 oficiales deteníos ayeri nuna gran operación que tenía por oxetivu antiguos militares, alcuéntrense l'ex xefe de l'Armada, almirante Ozden Ornek, l'ex xefe de la Fuerza Aéreo, xeneral Ibrahim Firtina, y l'antiguu 'númberu dos' del Estáu Mayor, xeneral Ergin Saygun.

Esti fechu provocó cierta conmoción política nesti país candidatu a ingresar na Unión Europea, y añadióse a les tensiones xeneraes pol enfrentamientu ente la xudicatura y el gobernante Partíu Xusticia y Desarrolu (AKP).

Polo menos a 29 de los deteníos tán interrogándolos nesti momentu nos cuarteles xenerales de la Policía d'Istambul, según informa la televisión NTV. A tros diez oficiales yá se los treslladó a un tribunal de la mesma ciudá, según l'axencia de noticies Anatolia, que señala que'l tribunal va dictaminar darréu si permanecen na so custodia o si queden en llibertá.

A los deteníos ta interrogándoselos baxo la sospecha de formar un grupu coles mires de deponer al Gobiernu, según la canal de noticies turca CNN. Al paecer, les nueves detenciones tán rellacionaes col casu Ergenekon, una investigación abierta contra esta organización ultranacionalista acusada d'intentar derrocar al Gobiernu turcu nel 2007.

La nueva fola de detenciones que se produxo ayeri ta específicamente vinculada al complot 'Balyoz', un presuntu golpe militar contra'l gobernante Partíu Xusticia y Desarrollu (AKP) nel añu 2003, polo que, posiblemente, nesti casu s'unan el complot 'Balyoz' y Ergenekon, informa'l diariu turcu 'Hurriyet'.

La razón pa realizar les detenciones tovía nun ta clara, pero la canal de televisión privada NTV informa que los deteníos güei presuntamente tienen les mesmes firmes que les atopaes nos documentos rellacionaos col plan 'Balyoz'.

Mientres, el xefe del Estáu Mayor, xeneral Ilker Basbug, retrasó una visita a Exiptu por cuenta de los últimos acontecimientos, anque l'Exércitu nun comentó tovía'l tema.

Acordies con informaciones anteriores de los medios de comunicación, el plan 'Balyoz', o 'Sledgehammer', entamáu nel 2003 y negáu pol Exércitu, les Fuerces Armaes entamaríen a provocar qu'aviones de combate griegos baltaren a un avión militar turcu y colocaren bombes en mezquites d'Istambul.

Les Fuerces Armaes derrocaron a cuatro gobiernos dende 1960 y una operación como ésta contra ellos sería inimaxinable hasta hai unos años, anque les reformes democrátiques inspiraes na UE reduxeron el poder del Exércitu.