El políticu mexicanu Cuauhtémoc Cárdenas destaca'l papel del exiliu asturianu nos cambios democráticos del so país

UVIÉU, 30 de Xineru (EUROPA PRESS)

El políticu mexicanu, Cuauhtémoc Cárdenas, fundador del Partíu de la Revolución Democrática, ex alcalde de México Distritu Federal y ex candidatu a la presidencia del so país, destacó güei n'Uviéu la participación de los descendientes del exiliu asturianu nes lluches polos cambios democráticos nesti estáu centroamericanu.

Cárdenas antendió a los medios de comunicación, enantes de recibilu la presidenta de la Xunta'l Principáu, María Jesús Álvarez, nel marcu d'una visita que ta realizando estos díes a Asturies.

Conocíu pola so tendencia progresista y contraria a los principios neolliberales, Cárdenas destacó la rellación del so país con Asturies gracies, en primer llugar, a la emigración, pero tamién a los munchos exiliaos y neños de la guerra qu'ellí llegaron. Concretamente, recordó a los llamaos 'Neños de Morelia', un continxente de rapacinos qu'acoyó'l so pa, Lázaro Cárdenas, presidente daquella del país.

Nesti sen recordó que "descendientes d'aquel exiliu fueron participantes activos nes llluches polos cambios democráticos, participaron en delles campañes y dieron puxu al cambiu democráticu". "De fechu, l'exiliu se fundió con México y se ficieron mexicanos ensin perder el so raigañu, y tuvieron presentes na vida cultural y política de México dende entós pa equí", añadió'l políticu americanu.

Per otra parte, definió la rellación ente México y Asturies como "una presencia y un intercambiu permanente, una collaboración que se dio históricamente con esta rexón y México, cola presencia d'asturianos en delles actividaes económiques, comerciales, profesionales y culturales".